Akti i terrorit në një prej klubeve të natës në Stamboll në të nisur të 1 janarit, prej së cilit humbën jetën 39 persona, është përcjellë me pikëllim në botë. Një pjesë e udhëheqësve botërorë kanë reaguar, duke shprehur keqardhjen për sulmin vrasës.
Shtëpia e Bardhë lajmëroi se presidenti Obama shprehu ngushëllimet për sulmin në një klub nate në Stamboll dhe i kërkoi ekipit të tij t’u ofrojnë ndihmë autoriteteve turke.
“…Presidenti u njoftua nga ekipi i tij i sigurisë kombëtare mbi sulmin në Stamboll. Presidenti shprehu ngushëllimet për jetët e pafajshme të humbura, dhe e urdhëroi ekipin e tij të japë ndihmën e duhur për autoritetet turke…,” tha përmes një deklarate zëdhënësi i Shtëpisë së Bardhë, Eric Schultz.
Në një tjetër deklaratë, këtë herë nga Departamenti i Shtetit, thuhej: “Shtetet e Bashkuara e dënojnë fuqimisht sulmin terrorist në një klub nate në Stamboll, në Turqi. Ne shprehim ngushëllimet tona për familjet dhe të dashurit e viktimave, dhe për popullin e Turqisë, si dhe shpresën për mëkëmbje të shpejtë të të plagosurve. Ne kemi për të qëndruar në kontakt të ngushtë me autoritetet turke gjatë hetimit.”
Sekretari i përgjithshëm i NATO-s, Jens Stoltenberg, shkroi një mesazh në Twitter, ku thoshte, “Nisje tragjike e 2017-s në Stamboll. Mendimet e mia janë me të prekurit nga sulmi mbi njerëzit që po festonin vitin e ri dhe me popullin turk.”
Përmes të njëjti rrjet social reagoi dhe presidenti i Parlamentit Europian, Martin Schulz, “Mendohej të qe një natë festimi: terroristët e kthyen atë në një natë dhune, vdekje, dëshpërimi. Mendimet e mia janë me Stambollin, me Turqinë.”
Ka reaguar dhe shefja e politikës së jashtme të BE-së, Federica Mogherini, “Mendimet tona janë me viktimat dhe të dashurit e tyre. Ne vazhdojmë të punojmë për t’i parandaluar këto tragjedi.”
Ministri i Jashtëm francez, Jean-Marc Ayrault, e përcolli kështu ngjarjen: “Me gjithë zemër jemi me Turqinë, e cila u godit lemerishëm në këtë natë simbolike.”
Një tjetër ministër i Jashtëm, ai i Kanadasë, u shpreh në Twitter, “Kanadaja u ofron ngushëllimet e saj familjeve të viktimave dhe dëshiron një shërim të shpejtë të të plagosurve në sulmin e tmerrshëm në Stamboll.”
“Zemrat tona janë me familjet dhe të dashurit e civilëve të vrarë dhe të plagosur nga terroristët në Stamboll,” lexohet në reagimin e drejtorit ekzekutiv të Këshillit për Marrëdhëniet Amerikano-Islame, Nihad Awad. /tesheshi.com/
