Dijetari i mirënjohur musliman jemenas, Abdul-Mejid el-Zindani, u shua të hënën (22 prill 2024) në Stamboll në moshën 82-vjeçare, pas një karriere të frytshme fetare, politike dhe shkencore të jashtëzakonshme, duke mbështetur dhe ndihmuar muslimanët e Jemenit dhe të mbarë botës me kontributet dhe potencialin e tij të madh.
Zindani ishte i njohur për pikëpamjet e tij parimore dhe bëri thirrje për zbatimin e ligjit islam në të gjitha fushat e jetës.
Qindra njerëz u konvertuan në Islam nga aktivitetet e tij, duke qenë një nga autorët më të spikatur në lëmin e vërtetimit shkencor të madhështisë së Zotit, Islamit dhe traditës profetike. Zindani ishte themelues i njërit prej universiteteve më të shquara në botën islame, Universitetit “Al-Iman” në Jemen.
Shejh Abdul-Majid al-Zindani lindi në fshatin Al-Dhahabi, në provincën jemenase të Ibb, në vitin 1942. Shkollimin fillor dhe të mesëm i mori në Aden, më pas shkoi në Egjipt dhe hyri në Fakultetin e Farmacisë, ku studioi për dy vjet.
Për shkak të interesimit të tij për shkencat e Sheriatit, ai filloi të studiojë shkencat islame që nga fëmijëria e hershme dhe qëndrimi i tij në Egjipt i mundësoi të takohet me dijetarët më të mëdhenj islamë në Universitetin “Al-Azhar”.
Pas kthimit në Jemen, ai mori drejtimin e institutit shkencor “El-Nur”, dhe më pas mori drejtimin e çështjeve shkencore dhe arsimore në Ministrinë e Arsimit.
Jetën shkencore dhe veprimtarinë thirrëse në Islam e filloi me shkrim dhe mësimdhënie. Ai shkroi librin Et-Tevhid (Njëshmëria e Krijuesit) si tekst shkollor për shkollat e mesme, duke u përkthyer dhe në shumë gjuhë.
Ai regjistroi shumë video leksione në të cilat tema dominuese është mbinatyrshmëria shkencore e Kuranit, siç është videokaseta “Innehul-Hakk” – “Ai është e vërteta”, e cila la një ndikim të fortë në masat dhe ishte shkaku i pranimit të Islamit nga shumë jomuslimanë. Librat dhe videokasetat e tij janë përkthyer në disa gjuhë botërore.
Sheikh al-Zindani jetoi për disa kohë në Arabinë Saudite ku mbajti leksione dhe kontribuoi në themelimin e Institucionit për Studimin e të Mbinatyrshmes Shkencore në Kuran dhe Sunet. Pastaj u kthye në Jemen dhe themeloi Universitetin “Al-Iman” për Shkencat e Sheriatit. Ai mori doktoraturën në Universitetin Islam të Sudanit.
Në një nga paraqitjet e tij të fundit, Sheikh al-Zindani u bëri thirrje të gjitha grupeve muslimane dhe vendeve muslimane që të për të mbështetur Palestinën dhe Gazën. /tesheshi.com/
