Presidenti rus Vladimir Putin tha të enjten se Rusia, në përgjigje të sulmeve nga raketat me rreze të gjatë veprimi amerikan dhe britanik, hodhi një raketë të re balistike me rreze të mesme veprimi “Oreshnik” në territorin ukrainas, të cilën, tha ai, sistemet moderne nuk kanë asnjë mënyrë për t’iu kundërvënë.
“Si përgjigje ndaj përdorimit të armëve amerikane dhe britanike, forcat e armatosura ruse kryen një sulm të kombinuar në një nga objektet e kompleksit ushtarako-industrial të Ukrainës”, tha Putin.
Ai shpjegoi se ky ishte testi i sistemit më të fundit të raketave me rreze të mesme veprimi të Rusisë, në këtë rast një raketë balistike hipersonike jo bërthamore, të cilën shkencëtarët rusë të raketave e quajtën “Oreshnik”.
Putin theksoi se sistemet moderne kundërajrore nuk mund të përgjojnë raketën “Oreshnik”, e cila udhëton me shpejtësi 2.5 deri në tre kilometra në sekondë dhe shtoi se nëse Rusia e përdor atë raketë në një konflikt kundër Ukrainës, do të paralajmërojë civilët paraprakisht.
Kërcënimi i Rusisë
Ai deklaroi se në rast të përshkallëzimit, Rusia do të përgjigjet reciprokisht, raportoi RIA Novosti.
Putin deklaroi se gjashtë raketa me rreze të gjatë veprimi ATACMS të prodhimit amerikan dhe një raketë Storm Shadow e prodhimit britanik u qëlluan në rajonin Kursk dhe Bryansk në Rusi të martën.
“Pas atyre sulmeve nga Ukraina, konflikti rajonal fitoi elemente të një konflikti global”, tha Putin, duke shtuar se “armiku nuk i ka arritur qëllimet e tij”.
Ai tha se veprime të tilla nuk do të ndikojnë në situatën në Ukrainë dhe se sulmet me armë të prodhuara në Perëndim nuk do të ndryshojnë rezultatin e luftës në Ukrainë.
Putin tha se Rusia ka të drejtë të përdorë armë kundër objektivave ushtarake të atyre që përdorin armë kundër tyre.
“SHBA-ja po e shtyn të gjithë botën drejt një konflikti global. Rusia është e gatshme të zgjidhë çështjet e diskutueshme me mjete paqësore, por është e gatshme për çdo zhvillim dhe gjithmonë do të përgjigjet. Prandaj rekomandoj që elitat në pushtet të vendeve që planifikojnë të përdorin kontigjente ushtarake kundër Rusisë duhet të mendojnë seriozisht për këtë”, tha Putin. /tesheshi.com/
