Një lajm i hidhur vjen nga bota e futbollit. Sol Bamba, ish-përfaqësuesi i Bregut të Fildishtë, ka vdekur në moshën 39-vjeçare. Ish-kapiteni i Leicester City-t u sëmur para ndeshjes së djeshme ndaj Adanaspor, klubi ku ai ishte drejtor teknik:
“Drejtori ynë teknik Souleymane Bamba, i cili u sëmur para ndeshjes së djeshme kundër Manisa-s, u shtrua në Spitalin Universitar Manisa Celal Bayar dhe fatkeqësisht humbi betejën e jetës atje. Ngushëllime komunitetit tonë dhe gjithë familjes së futbollit, veçanërisht familjes së tij…” njoftoi klubi në rrjetet sociale.
Bamba u diagnostikua me limfomën Non-Hodgkin në janar 2021, pas së cilës iu nënshtrua kimioterapisë. Katër muaj më vonë ai zbuloi se kanceri ishte zhdukur, por tashmë mediat turke raportojnë se ai përfundoi në spital për shkak të një rikthimi të sëmundjes.
Ai e filloi rrugëtimin e tij të futbollit në Paris Saint Germain, dhe më pas luajti për Dunfermline, Hibernian, Leicester, Trabzonspor, Palermo, Leeds, Cardiff dhe Middlesbrough. Ai la gjurmën më të madhe në ishull, pasi dikur ishte kapiten i Leeds-it, por edhe anëtar i skuadrës së Cardiff-it që fitoi ngjitjen në Premier League në vitin 2018. Klubi uellsian i ka thënë lamtumirë ish-lojtarit të tij me një mesazh të veçantë:
“Si lojtar dhe trajner, ndikimi i Sol në klubin tonë të futbollit ishte i pamatshëm. Ai ishte heroi ynë, një lider në dhomën e zhveshjes dhe një zotëri i vërtetë“, shkroi Cardiff. /tesheshi.com/
