Më 28 qershor 2020, Asambleja e Përgjithshme e Kombeve të Bashkuara miratoi me konsensus tekstin e Rezolutës (A/74/L.66), e cila përcakton datën 9 shtator të çdo viti si Ditën Ndërkombëtare për Mbrojtjen e Edukimit nga Sulmet. Kjo rezolutë u miratua pas propozimit të HH Sheikha Moza bint Nasser – Themeluese dhe Kyetare e Fondacionit “Edukimi mbi të Gjithë” (Education Above All) dhe Avokate e Objektivave të OKB për Zhvillimin e Qëndrueshëm.
Dita Ndërkombëtare për Mbrojtjen e Edukimit nga Sulmet vjen në një kohë, kur bota po përballet me një krizë shëndetësore globale të paprecedentë, me konflikte të armatosura, shpëngulje me forcë, ndryshime klimatike dhe katastrofa të shkaktuara nga krizat e zgjatura. Këto kriza kanë penguar arsimimin e 75 milion fëmijëve dhe të rinjve në botë, numër i cili vazhdon të rritet ende, gjë që përkeqëson pabarazinë aktuale të shkaktuar nga pandemia e COVID-19.
Dita Ndërkombëtare për Mbrojtjen e Edukimit nga Sulmet më 9 shtator, konsiderohet fillimi i një oportuniteti vjetor për tu bashkuar të gjithë në mbrojtje të arsimit në mënyrë që askush të mos mbetet pas, sidomos shtresat e dobëta e të margjinalizuara.
Me rastin e kësaj dite, Organizata për Edukim, Shkencë dhe Kulturë e Kombeve të Bashkuara (UNESCO) në bashkëpunim me UNICEF, Fondacionin “Education Above All” dhe Delegacionin e Përhershëm të Katarit në OKB, do të organizojë sot një event virtual të nivelit të lartë për inaugurimin e kësaj dite ndërkombëtare, ku do të marrin pjesë personalitete të spikatura botërore, drejtues të organizatave ndërkombëtare dhe përfaqësues të lartë nga mbarë bota, si dhe Sekretari i Përgjithshëm të OKB-së z. Antonio Guterres.
Gjithashtu, në këtë event do të mblidhen ekspertë të arsimit dhe zhvillimit humanitar për të evidentuar rëndësinë e parandalimit të sulmeve ndaj arsimit gjatë konflikteve të armatosura, si dhe të inkurajojë ratifikimin dhe zbatimin e Deklaratës për Shkollat e Sigurta (e miratuar në Oslo, Norvegji më 29 maj 2015).
Dita Ndërkombëtare për Mbrojtjen e Edukimit synon të stimulojë veprimin efektiv të komunitetit ndërkombëtar për t’i garantuar gjithëve mbrojtje dhe edukim, sidomos atyre të cilët jetojnë në zona konflikti e pasigurie, dhe atyre të cilëve iu mohohet aksesi në një arsim të sigurt dhe cilësor. /tesheshi.com/
