Anadolu Agency bën me dije se Gjykata Ndërkombëtare e Drejtësisë e ka hedhur poshtë një ditë më parë apelin e Bosnjë-Hercegovinës për të rishqyrtuar një vendim të 2007-s që e nxirrte të larë Serbinë nga akuzat për gjenocid.
Apelimi është hedhur poshtë me arsyetimin se vendimi për rihapjen e çështjes nuk është një i tillë i përbashkët nga anëtarët e këshillit, qartëson presidenca e vendit ballkanik.
I dalë në një konferencë shtypi, anëtari boshnjak i presidencës së Bosnjë-Hercegovinës, Bekir Izetbegoviç, ka deklaruar i pezmatuar se dyert e Gjykatës Ndërkombëtare të Drejtësisë ishin të mbyllura për njerëzit që kërkonin drejtësi.
“Vendimi i marrë nuk është i saktë, sepse duhet të bazohet në prova dhe dokumente. Gjykata Ndërkombëtare e Drejtësisë ka treguar një qëndrim politik, jo ligjor. Ajo ka dëshmuar me këtë vendim se nuk ka drejtësi për popujt e vegjël.”
Dhjetë vite më parë, Gjykata Ndërkombëtare e Drejtësisë e përshkruante masakrën e Srebrenicës si një rast gjenocidi, por pa e përcaktuar Serbinë si përgjegjëse të drejtpërdrejtë për të.
Për drejtuesen e Shoqatës së Nënave të Srebrenicës, Hatixhe Mehmedoviç, bashkësia ndërkombëtare ishte bashkëfajtore në luftën në Bosnjë dhe në gjenocidin në Srebrenicë.
“Shpresuam se do të kishte drejtësi, por nuk ka,” qenë fjalët e saj. /tesheshi.com/
