Në shoqërinë boshnjake ka shpërthyer një debat mbi faktin nëse duhet apo të festohet Viti i Ri me shpenzime të cilat duhet të shkonin për fëmijët e civilët e Halepit. Kjo për shkak se vetë Bosnja dikur kalonte atë që po kalon sot qyteti tragjik sirian (në foto bëhet krahasimi mes Sarajevës para 20 vitesh dhe Halepit sot).
Dhe ja ç’shkruhet në një prej editorialeve të një prej portaleve më të klikuara në Bosnjë:
“Sarajeva si edhe shumë qytete tjera të mëdha në botë, sivjet do të organizojë një manifestim festiv të pritjes së Vitit të Ri. Por në shoqërinë tonë, po zhvillohen polemika në lidhje me organizimin e një ngjarje si kjo. Opinioni publik është i ndarë. Polemikat po zhvillohen rreth gjërave të parëndësishme si për shembull, nëse duhet ndaluar apo jo shitja e alkoolit në Sarajevë.
Ndërkohë, në një cep tjetër të botës, në Siri, mijëra e mijëra civilë dhe fëmijë po kalojnë nëpër golgotën, ndoshta më të madhe me të cilën ai popull është ballafaquar ndonjëherë në histori. Fëmijët dhe populli i Sirisë nuk kanë asnjë arsye për të festuar. Në këto momente, ndërsa ne mendojmë për Vitin e Ri, në Siri po vriten civilë të pafajshëm, të privuar pothuajse nga çdo ndihmë elementare.
Çfarë mund të bëjmë ne si sarajevas për popullin e Halepit, përpos ofrimit të një mbështetje verbale të dhembushisë sonë ndaj tyre? A mundemi ne, si qytetarë, si shtet, të ofrojmë ndonjë ndihmë më konkrete? A duhet të ndiejmë detyrim moral që të paktën të përpiqemi, që fjalët tona, që dhembshuria jonë për atë që po ndodh sot në Halep, të mos mbetet një iluzion i pavlerë, i privuar nga çfarëdo përmbajtje?
Për këtë shkak, ideja për të anuluar festimin e organizuar të Vitit të Ri në Sarajevë, për të cilën janë ndarë të ardhura të konsiderueshme për t’iu kaluar fëmijëve dhe civilët në nevojë në Halep, ndoshta do të ishte e gjëja më e mirë që do të mund të kishim bërë në këto momente.
Me këtë, asnjë qytetar i Sarajevës dhe Bosnjë-Hercegovinës nuk do të ishte i humbur. Sarajeva duhet ta tregojë zemrën e saj në këtë mënyrë. Duke ndihmuar fëmijët në nevojë në Halep, ajo do të tregojë se nuk harroi fëmijët e saj të vrarë. Ky do të ishte mesazhi thelbësor i mbështetjes dhe solidaritetit.
Nëpër rrjetet sociale tashmë po dëgjohen zëra të ngjashëm si ky. Qytetarët e Sarajevës me siguri se kanë nevojë të përmbushin detyrimin e tyre moral”, përfundon editoriali ku bëhet thirrje që shpenzimet e Vitit të Ri të shkojnë për të vuajturit e Halepit në Siri. /tesheshi. com/
