Me dhjetëra përfaqësues të lartë shtetërore marrin pjesë në ceremonitë përkujtimore me rastin e 20 vjetorit të masakrës së Srebrenicës në Bosnje. Mijëra qytetarë gjithashtu janë të pranishëm ndërsa nisin aktivitetet e planifikuara për këtë ditë, në nderim të 8 mijë burrave dhe djemve muslimanë, të masakruar nga trupat serbe të Bosnjës, në Srebrenicë para 20 vitesh.
Masakra më e madhe që pas Luftës së Dytë është njohur si genocid nga shumë vende, ndërsa rezoluta e OKB-së që e cilësonte Srebrenicën genocid u bllokua nga rusët.
Kryeministri serb, Aleksandar Vucic është i pranishëm në ceremonitë përkujtimore në Srebrenicë, e pritet me interes sjellja e tij në këtë rast.
Në ceremoni marrin pjesë edhe liderë ndërkombëtarë, përfshirë përfaqësuesen e lartë të Bashkimit Evropian për politikë të jashtme dhe siguri, Federica Mogherini, kryeministri i Turqisë, Ahmet Davutoglu, Mbretëreshën Noor e Jordanisë, ish-presidenti amerikan, Bill Clinton, e të tjerë.
Gjatë këtij tubimi përkujtomor do të zhvillohet edhe funerali i 136 trupave të pajetë, që së fundi janë identifikuar me anë të testeve ADN.
