Ambasadori i Holandës në Kosovë, Robert Bosch të martën gjatë një takimi me studentët e Shkencave Politike të Fakultetit Filozofik, të Universitetit të Prishtinës “Hasan Prishtina”, ka thënë se më mirë do të ishte që gjykata speciale për krimet e kryera gjatë luftës së fundit të krijohej nga Kosova, e jo nga OKB-ja, pasi që në këtë organizatë ka shtete të cilat nuk janë miqësore me Kosovën.
Sipas tij, tashmë është vendosur përfundimisht se Kosova duhet ta ketë një gjykatë të tillë speciale.
Ai ka thënë se ende nuk dihet nëse gjykata do ta ketë selinë në Holandë, pasi që për këtë siç tha ai, fillimisht duhet të merret leja dhe pajtimi i parlamentit holandez.
“Para se gjithash me aq sa unë di, gjykata speciale do të vijë në Holandë nëse parlamenti ynë pajtohet me këtë. Ata natyrisht kanë lexuar nëpër gazeta, por zyrtarisht nuk janë informuar pasi që ne jemi duke pritur që së pari ky proces të përfundoj, pasi që parlamenti i Kosovës nuk është pajtuar dhe nuk e ka diskutuar këtë çështje. Kështu që parlamenti ynë nuk mund të merret me diçka që ende nuk ekziston”, ka thënë Bosch.
Ai ka vlerësuar se Kosova ka nevojë për një gjykatë speciale dhe se refuzimi i saj që po bëhet nga ana e opozitës nuk është i mirë.
“Mosthemelimi i kësaj gjykate do të thoshte se çështjet e përmendura për t’u trajtuar nga kjo gjykatë do të kalonin në një gjykatë që do të themelohej nga Organizata e Kombeve të Bashkuara dhe aty ka shtete që nuk janë aq miqësore me Kosovën”, ka theksuar Bosch, raporton kosovalive.
Ndërkaq, duke folur për zhvillimet tjera në Kosovë, ambasadorit holandez ka thënë se dy çështjet kryesore në të cilat duhet të fokusohet qeveria dhe institucionet vendore kanë të bëjnë me krijimin e vendeve të punës, si dhe me sundim të ligjit që nënkupton luftimin e korrupsionit.
Po ashtu, Bosch ka folur edhe për valën e fundit të migrimit ilegal nëpër vendet e BE-së, duke thënë se ky proces do të dëmtoj procesin e liberalizimit të vizave, si dhe ka përsëritur faktin se BE-ja nuk jep azil për vendet si Kosova, i cili tashmë sipas tij, është një vend i sigurt. /tesheshi.com/
