Van Gaal humbi një prej krenarive të vetme që kur mori drejtimin e Mançester Junajtedit: fitoret ndaj Liverpulit.
Shorti desh që dy skuadrat e famshme angleze të viheshin përballë njëra-tjetrës në 1/8-at e Ligës së Europës, dhe sfidën e parë mes tyre e fitoi bindshëm Liverpuli.
Golat e realizuar nga Sturridge në minutën e 20-të, me 11-metërsh, dhe nga Firmino në të 73-tën i dhanë
fitoren 2-0 Liverpulit. Qe një ndeshje ku Mançesteri nuk gjuajti asnjë goditje nga këndi, e bëri vetëm një gjuajtje brenda kuadratit të portës kundërshtare. Veç kësaj, portieri De Gea bëri një seri pritjesh fantastike, duke e shpëtuar skuadrën e tij nga një humbje shumë më e thellë.
I ashpër është treguar ish-lojtari i “djajve të kuq”, Paul Scholes. Ja fjalët e tij, “Katastrofë! Katastrofë absolute! Shihni në fushë. Ç’po kërkonin të bënin? Unë nuk kam absolutisht asnjë ide. Mançester Junajtedi ka humbur identitetin nën Van Gaal-in.”
Një tjetër humbje të thellë pësoi Totenhemi, që u mund 3-0 në Dortmund karshi Borusias. E papritur kjo humbje për skuadrën që pretendon të fitojë kampionatin anglez. Kjo është humbja më e thellë e Totenhemit në këtë sezon, ndërsa tre gola nuk i pësonte që nga maji i vitit të shkuar. Për skuadrën gjermane, një gol e shënoi Aubameyang, e dy të tjerët mbajnë firmën e Marco Reus-it.
Në përballjen spanjolle, Atletik Bilbao fitoi 1-0 ndaj Valencias. Sparta e Pragës dhe Lacio u kënaqën me një barazim 1-1 mes tyre. Vilareali siguroi një fitore bindëse ndaj Bajer Leverkusenit, 2-0, ndërsa turqit e Fenerbahçes i mundën minimalisht, 1-0, portugezët e Bragës. Shakhtari i Donjeckut bëri një hap të sigurt drejt çerekfinaleve të Ligës së Europës me fitoren 3-1 ndaj Anderlehtit, kurse Bazeli dhe Sevilja e lanë gjithçka të hapur pas barazimit 0-0.
Ndeshjet e dyta të kësaj faze të Ligës së Europës do të luhen të enjten që vjen. /tesheshi.com/
