Shefi i Diplomacisë së Bashkimit Evropian, Josep Borrell, ka vlerësuar se ngjarjet në marrëdhëniet ndërmjet Kosovës dhe Serbisë rrezikojnë vitet e punës së palodhur dhe atë që është arritur në dialogun Beograd-Prishtinë, si dhe se e komplikojnë situatën e sigurisë në rajon dhe më gjerë.
Bashkimi Evropian, shtoi Borrell në një deklaratë, u bën thirrje të dyja palëve të përmbahen nga çdo veprim i njëanshëm që mund të çojë në tensione të mëtejshme.
Borrell shtoi se tërheqja e serbëve nga institucionet e Kosovës nuk është zgjidhje për mosmarrëveshjet aktuale dhe i bëri thirrje Serbisë dhe përfaqësuesve të serbëve të Kosovës që të respektojnë zotimet nga dialogu dhe të kthehen në institucionet e Kosovës, përfshirë policinë, gjyqësorin dhe administratën lokale.
“Siguroni paqen dhe stabilitetin”
Në të njëjtën kohë, BE-ja u bën thirrje edhe një herë autoriteteve të Kosovës që të respektojnë detyrimet e tyre pa vonesë, që nënkupton vazhdimin e menjëhershëm të procesit të riregjistrimit të automjeteve dhe pezullimin e çdo veprimi ndëshkues ndaj pronarëve të targave KM, tha Borrell në një deklaratë me shkrim.
BE-ja gjithashtu i bën thirrje Kosovës që menjëherë të iniciojë hapa drejt krijimit të një komuniteti të komunave me shumicë serbe (ZSO), shtoi ai.
Kuvendi i Kosovës ratifikoi Marrëveshjen e Brukselit dhe Gjykata Kushtetuese e Kosovës vendosi që komuniteti të krijohet, tha Borrell dhe tha se prandaj është obligim ligjor për Kosovën.
Ai shtoi se është përgjegjësi e të dyja palëve për të siguruar paqen dhe stabilitetin.
BE-ja është e gatshme të vazhdojë të ndihmojë negociatat
“Çdo veprim, si djegia e makinave apo retorika frikësuese që mund të çojë në tensione është e papranueshme dhe do të provokojë një përgjigje të përshtatshme nga komuniteti ndërkombëtar”, shtoi Borrell.
Siç ka theksuar ai, EULEX-i është i gatshëm të sigurojë stabilitet në Kosovë.
“BE-ja është e gatshme të vazhdojë të ndihmojë negociatat, por të dyja palët duhet të tregojnë vullnetin e tyre për të kërkuar zgjidhje në mënyrë konstruktive dhe të respektojnë angazhimet e tyre të ndërmarra në dialog”, shtoi ai.
Borrell po ashtu në Tëitter ka thënë se ka biseduar me presidentin e Serbisë, Aleksandar Vuçiç dhe kryeministrin e Kosovës, Albin Kurti. /tesheshi.com/
