Shefi i diplomacisë evropiane, Josep Borrell, tha se procesi i normalizimit të marrëdhënieve në bazë të propozimit të Bashkimit Evropian do të sjellë përfitime si për Serbinë ashtu edhe për Kosovën.
Borrell u tha gazetarëve në Bruksel se kjo është “e vetmja mënyrë për të thyer rrethin vicioz të krizës në terren dhe për të zvogëluar rrezikun e përshkallëzimit të mëtejshëm”.
“Ne presim një angazhim serioz dhe vullnet (nga të dy palët) për t’u angazhuar në mënyrë konstruktive për të bërë përparim në propozimin (BE),” tha Borrell, referuar një plani franko-gjerman.
Pas një sërë tensionesh mes Serbisë dhe Kosovës, presidenti serb Aleksandar Vuçiç tha të hënën në mbrëmje se plani për Kosovën që Uashingtoni dhe Brukseli i parashtruan Beogradit është bërë korniza de facto e negociatave për hyrjen e Serbisë në Bashkimin Evropian, duke paralajmëruar një sërë pasojat politike dhe ekonomike nëse plani nuk pranohet.
“Evropa është në luftë”
Ai theksoi se diplomatët amerikano-evropianë e paralajmëruan se në të kundërtën Serbia do të përballet me ndërprerjen e procesit të integrimit evropian, anulimin e regjimit pa viza me vendet e BE-së, ndalimin e më pas tërheqjen e investimeve dhe “masa gjithëpërfshirëse në politikë dhe ekonomi”, që do t’i shkaktojë dëme të mëdha Serbisë.
“Evropa është de fakto në luftë”, tha Vuçiç, duke shtuar se për shkak të rrethanave të ndryshuara gjeopolitike, ekziston një nervozizëm i madh dhe për këtë Perëndimi nuk dëshiron më të tolerojë asnjë largim nga ato që janë interesat perëndimore. /tesheshi.com/
