Përfaqësuesi i Lartë i BE për Punët e Jashtme dhe Politikën e Sigurisë Josep Borrell tha se aktualisht ka një atmosferë më të mirë në marrëdhëniet BE-Turqi sesa verën e kaluar dhe shprehu besimin se takimi i tij i ardhshëm me ministrin e Jashtëm turk Mevlut Çavusoglu do të ndryshonte dinamikën në një mënyrë positive në marrëdhëniet midis Brukselit dhe Ankarasë.
Borrell iu drejtua anëtarëve të Parlamentit Evropian ku i informoi ata rreth politikës së jashtme të përbashkët dhe politikës së mbrojtjes dhe me këtë rast njoftoi se do të takohej me ministrin turk Cavusoglu në 21 janar në Bruksel.
“Do të jetë një takim i gjatë. Ne do të përpiqemi të arrijmë një mirëkuptim më të mirë reciprok,” tha Borrell.
Duke theksuar se samiti i dhjetorit i udhëheqësve të Bashkimit Evropian dërgoi një sinjal të qartë interesi për ndërtimin e marrëdhënieve më të mira fqinjësore, Borrell tha se hapa të tillë duhej të bëheshin nga të dy palët.
Atmosferë më e mirë
“Ne kemi një atmosferë më të mirë për momentin sesa ishte verën e kaluar. Shpresoj se ky do të jetë një takim shumë më i gjatë se ai që kemi pasur në Maltë në gusht, i cili nuk zgjati as një orë. Ne do të shohim nëse mund ta ndryshojmë dinamikën e marrëdhënies. Jam i bindur se mundemi,” tha Borrell.
Ministri i Jashtëm turk Çavusoglu do të bëjë një vizitë zyrtare në Bruksel nga 20 deri në 22 janar dhe përveç Borrell, ai do të takohet me udhëheqësit e Këshillit Evropian dhe Komisionit Evropian.
Çavusoglu do të takohet gjithashtu me homologen e tij belge Sophia Ëilmes dhe sekretarin e përgjithshëm të NATO-s Jens Stoltenberg. /tesheshi.com/
