Ballkani Perëndimor është në zemër të Evropës dhe e ardhmja e vendeve të këtij rajoni është në Bashkimin Evropian dhe kjo është arsyeja pse angazhimi ynë në këtë kuptim ishte dhe mbetet kaq i fortë, tha të martën Përfaqësuesi i Lartë i BE, Josep Borrell.
Duke iu drejtuar të mbledhurve në Samitin e Ballkanit Perëndimor, ai theksoi se interesi i përbashkët është integrimi i këtij rajoni dhe përmirësimi i prosperitetit të shteteve, sundimi i ligjit dhe siguria.
Ai kujtoi se ka sfida të përbashkëta, ndaj të cilave kërkohet një përgjigje e përbashkët dhe përmendi si shembull pandeminë aktuale të virusit koronar.
Që nga fillimi i pandemisë, BE ka mbështetur Ballkanin Perëndimor si partneri i saj më i ngushtë, tha Borrell, duke siguruar mbështetje financiare për sigurimin e pajisjeve mjekësore dhe përfshirjen e rajonit në mekanizmin e përbashkët të prokurimit të BE.
Unioni vlerëson tregun e përbashkët
“Tani po përqendrohemi gjithashtu në rimëkëmbjen, duke siguruar mbështetje afatgjatë dhe të qëndrueshme për rajonin përmes Planit Ekonomik dhe të Investimeve të BE, i cili u miratua së fundmi nga Komisioni Evropian,” tha ai.
Ai shtoi se të gjithë janë të vetëdijshëm se sa BE vlerëson tregun e përbashkët, pasi ai është një nga pasuritë më të rëndësishme të Unionit.
Në prag të këtij samiti, vëren ai, ishte i impresionuar nga puna për krijimin e një tregu të përbashkët për Ballkanin Perëndimor (Schengeni rajonal), duke zhbllokuar potencialin ekonomik të rajonit dhe duke e bërë rajonin ekonomikisht të qëndrueshëm për pranimin në BE.
Në të gjitha këto, nuk duhet harruar, nënvizoi ai, se rimëkëmbja duhet të jetë e qëndrueshme dhe e drejtë shoqërore, që do të thotë të përpiqesh për rimëkëmbjen e gjelbër ekonomike dhe transformimin dixhital të ekonomisë dhe shoqërisë, prandaj Plani Ekonomik dhe i Investimeve, si dhe Axhenda e Gjelbër për Ballkanin Perëndimor janë përqëndruar në gjetje moderne dhe investime miqësore me mjedisin.
Tejkalimi i trashëgimisë të së kaluarës
“Kjo gjithashtu do të thotë që investimet duhet të mbështeten nga reformat themelore, të cilat janë të nevojshme në rrugën evropiane. Çdo partner në rajon e di se çfarë duhet të bëhet. Tani, gjithashtu me vendimin e mirëpritur për të hapur negociatat e pranimit me Shqipërinë dhe Maqedoninë e Veriut, është koha që e momenti pozitiv”, tha Borrell.
Ai shtoi se bashkëpunimi, siç po bëhet brenda BE-së, është mënyra më e mirë për të kapërcyer trashëgiminë e së kaluarës dhe për të ndërtuar një të ardhme më të mirë, e cila do të ishte një sinjal i qartë për brezat e ardhshëm që të marrin seriozisht aspiratat e tyre për shoqëri paqësore.
Siç përfundoi Përfaqësuesi i Lartë i BE në fjalimin e tij në Samitin për Ballkanin Perëndimor, ky takim është një mundësi e mirë për të diskutuar se si dikush mund të kontribuojë praktikisht dhe konkretisht për t’i bërë aspiratat e të rinjve një realitet. /tesheshi.com/
