Përfaqësuesi i Lartë i Bashkimit Evropian për politikën e jashtme, Josep Borrell, i dërgoi një thirrje pak të maskuar Shteteve të Bashkuara të Amerikës që të rishqyrtojnë ndihmën ushtarake për Izraelin për shkak të numrit të madh të viktimave civile në luftën në Gaza.
Borrell kujtoi se presidenti amerikan Joe Biden tha javën e kaluar se përgjigja e Izraelit ndaj sulmit të 7 tetorit nga Hamasi ishte “e tepruar” dhe se zyrtarët amerikanë kanë thënë vazhdimisht se shumë civilë janë vrarë në Gaza.
“Epo, nëse besoni se po vriten shumë njerëz, ndoshta duhet të dërgoni më pak armë për të parandaluar vrasjen e kaq shumë njerëzve,” u tha Borrell gazetarëve pas një takimi të ministrave të ndihmës për zhvillim të BE-së në Bruksel.
“Nëse bashkësia ndërkombëtare beson se kjo është një masakër, se po vriten shumë njerëz, ndoshta duhet të mendojmë për furnizimin me armë”, shtoi ai.
Ministri i Jashtëm francez Stephane Sejourne tha se një sulm izraelit në Rafah, ku më shumë se një milion palestinezë të zhvendosur janë të rrethuar dhe nuk kanë ku të shpëtojnë, do të ishte i pajustifikuar, njoftoi agjencia e lajmeve Reuters.
Komentet e Sejourne shtojnë presionin ndërkombëtar në rritje, duke paralajmëruar Izraelin që të mos vazhdojë me sulmin në Rafah.
Kombet e Bashkuara thanë se një sulm i tillë do të ishte një “makth” për qindra mijëra civilë që jetojnë në qytetet me tenda pranë kufirit me Egjiptin, ku Izraeli u ka thënë atyre që të evakuohen nga zona të tjera të Gazës. /tesheshi.com/
