Joseph Borrell, kreu i ri i diplomacisë europiane që vizitoi Prishtinën, nuk dha garanci për një liberalizim të shpejtë të vizave, por tha se ai duhej të kish ndodhur.
“Liberalizimi i vizave është objektivi jonë i përbashkët dhe është dashur të ndodh shumë më herët. Unë e di se qytetarët e Kosovës duan të udhëtojnë lirshëm në shtetet e Bashkimit
Evropian dhe situata momentale i bën ata të ndihen të izoluar. Nuk mund të jap premtime rreth asaj se kur do të ndodhë liberalizimi i vizave, pasi që ky vendim merret nga shtetet anëtare.
Por, nga ana ime dhe ana e Komisionit, Kosova i ka përmbushur kriteret dhe është koha të ecim tutj”, tha ai në një intervistë për telegrafin kosovar.
Ai edhe njëherë i mëshoi marrëveshjes me Serbinë, duke e vënë atë të parën në axhendë, për të cilën tha se ishte impenjimi i tij kryesor.
“Është prioritet për regjionin, për shtetet anëtare dhe për mua. Kjo është arsyeja se përse kaq shpejt kam dashur të vijë në Kosovë dhe Serbi. Unë personalisht jam i përkushtuar të shpenzojë kohë dhe të përpiqem maksimalisht për ta arritur marrëveshjen finale.
Që të dyja, Kosova dhe Serbia, duhet që sa më parë ta kenë një marrëveshje finale e cila i zgjidhë të gjitha problemet e hapura. Rrethanat momentale janë duke e penguar këtë. Shumë energji politike shkon për normalizimin ose për mos normalizimin e marrëdhënieve. Do të ishte mirë që e tërë kjo energji politike të shkojë për reforma, investime apo për ambientin. Kjo është arsyeja se përse gjendja momentale nuk mund të zgjatë më shumë.
Nuk ka status quo. Status quo do të thotë të ecim prapa. Serbia dhe Kosova duhet ta kenë marrëveshjen finale në mënyrë që të ecin në rrugët e tyre evropiane”, theksoi zyrtari i lartë i Brukselit. /tesheshi.com/
