BE dëshiron të gjejë një mënyrë për marrëdhënie më të shëndetshme me Turqinë, dhe për këtë qëllim duhet të punojmë për të ruajtur hapësirën për dialog, por edhe për të përfaqësuar fuqimisht interesat tona, tha Ministri i Jashtëm i BE-së, Josep Borrell.
Pas një takimi jozyrtar të Këshillit të Ministrave të Jashtëm të BE në Berlin, ai theksoi se BE është e qartë kur bëhet fjalë për të mbrojtur interesat e saj dhe solidaritetin me Greqinë dhe Qipron në mosmarrëveshjen me Turqinë.
“Turqia duhet të përmbahet nga veprimet e njëanshme, e cila është një element themelor i domosdoshëm për vazhdimin e dialogut tonë,” tha Borrell.
Ai thotë se BE do të punojë për “t’i dhënë një shans dialogut”, dhe ai personalisht do të krijojë hapësirë për negociata për të gjitha çështjet e pazgjidhura që rrjedhin nga marrëdhëniet “të vështira dhe të ndërlikuara” BE-Turqi.
“Në të njëjtën kohë, është e qartë se ka një zhgënjim në rritje me sjelljen turke. Këshilli i BE ka treguar një konsensus politik për të shpejtuar punën për zgjerimin e listës së atyre që janë përgjegjës për shpimet e paligjshme në Mesdheun Lindor,” tha Borrell.
Ai njoftoi se, nëse nuk ka përparim në bisedimet me Turqinë, BE do të konsiderojë masa shtrënguese shtesë kundër Ankarasë në shtator. /tesheshi.com/
