Përfaqësuesi i Lartë i BE për Punët e Jashtme dhe Politikën e Sigurisë Josep Borrell akuzoi Rusinë për përhapjen e dezinformatave në lidhje me vaksinat e tjera në mënyrë që të shesë sasi më të mëdha të sajat.
Në një tekst në një blog në internet, kreu i diplomacisë evropiane Borrell theksoi rëndësinë e veçantë të luftës kundër keqinformimit që po përhapet në internet.
Borrell pretendon se disa subjekte në promovimin e vaksinave të tyre kundër koronavirusit sulmojnë besueshmërinë dhe efektivitetin e vaksinave të tjerA dhe shtoi se disa aktorë të jashtëm po zhvillojnë gjithashtu fushata për të përhapur pretendime të rreme ose të pabazuara.
“Për shembull, shpikësit perëndimorë të vaksinave janë objekt talljeje në mediat e kontrolluara nga shteti rus. Kjo ndonjëherë shkon deri atje sa të bëjë pretendime të pakuptimta se vaksina do ta kthejë një njeri në majmun. Mesazhe të tilla duket se u drejtohen vendeve në të cilat Rusia dëshiron të shesë vaksinën e saj Sputnik V”, tha Borrell.
Ai më tej shkroi se mesazhe dhe fushata të tilla të pabazuara përbëjnë një kërcënim për shëndetin e njeriut, duke shtuar se disa organizata, të tilla si Shteti Islamik i Irakut dhe Levantit (ISIL), abuzojnë me konfuzionin në mendjet e njerëzve gjatë një pandemie.
Dezinformimi, argumenton Borrell, nuk është një fenomen i ri, porse zhvillimi i platformave të internetit ka çuar në përhapjen e shpejtë të aktiviteteve të tilla.
“Disa vende, të tilla si Rusia dhe Kina, po ndjekin në mënyrë aktive aktivitete të tilla dhe po përpiqen të minojnë sistemin tonë demokratik bazuar në vlera të tilla si liria, pluralizmi dhe ndarja e pushteteve,” tha Borrell. /tesheshi.com/
