Anëtarët e Bashkimit Evropian kërkojnë që të ndalet përshkallëzimi dhe të mbahen zgjedhje në veri të Kosovës me pjesëmarrjen e serbëve të Kosovës, duke paralajmëruar masa financiare dhe politike nëse kjo nuk ndodh, ndërsa i kanë bërë thirrje Prishtinës dhe Beogradit që të dëshmojnë gatishmëri për zbatimin e detyrimeve nga dialogu për normalizimin e marrëdhënieve.
Masat tashmë janë duke u përgatitur nga Komiteti i Sigurisë Politike i BE-së dhe ato varen nëse do të mbahen zgjedhjet dhe do të zgjidhen drejtuesit legjitimë të komunave, tha përfaqësuesi i lartë i BE-së, Josep Borrel, duke shpjeguar konkluzionet e krerëve të diplomacisë së vendeve të Bashkimit.
Ai theksoi se “anëtarët e BE-së shprehin shqetësimin shumë serioz për përshkallëzimin në Kosovë” dhe theksoi se “Unioni do të ketë parasysh vendimin e Beogradit për lirimin e tre policëve të Kosovës”.
“Vendet e BE-së, nëse është e nevojshme”, theksoi Borrell, “do të zbatojnë masa për të forcuar levën e ndikimit të Bashkimit Evropian dhe për të mbështetur dialogun me qëllim të normalizimit” të marrëdhënieve ndërmjet Serbisë dhe Kosovës. Ai tha se Brukseli do të vazhdojë kontaktet me të dyja palët në ditët në vijim.
Borrell theksoi se “zgjedhjet në katër komuna në veri të Kosovës duhet të organizohen me pjesëmarrjen e pakushtëzuar të serbëve të Kosovës dhe të dyja palët duhet të tregojnë vullnetin e tyre për të zbatuar obligimet nga dialogu”.
Përfaqësuesi i lartë i BE-së ka paralajmëruar se është e paqëndrueshme që komunat në veri të Kosovës “të mbrohen përgjithmonë nga KFOR-i”.
Në fund të majit, serbët lokalë kundërshtuan që kryetarët shqiptarë etnikë të merrnin detyrën pas zgjedhjeve lokale në katër komuna veriore ku pjesëmarrja ishte vetëm 3.4 përqind sepse serbët, të cilët përbëjnë shumicën në veri të Kosovës, i bojkotuan ato.
Përshkallëzimi shtesë i tensioneve pasoi dy javë më vonë, në mes të qershorit, kur forcat serbe arrestuan tre policë të Kosovës, për të cilët pretendojnë se kishin hyrë në territorin serb, të cilën Kosova e mohon, duke pretenduar se policia serbe i ka rrëmbyer në territorin e Kosovës. Si reagim, qeveria e Kosovës ka ndaluar hyrjen e mallrave serbe në Kosovë. /tesheshi.com/
