Mospranimi nga ana e Albin Kurtit të një propozimi europian për çështjen e targave, ka sjellë reagimin e parë nervoz në Bruksel. Pikërisht nga Borrell, kreu i diplomacisë europiane, i cili së bashku me Lajçak diskutuan për mbi 7 orë me Kurtin e Vuçiçin në kryeqytetin e BE-së.
Gjithsesi, Borrell është treguar diplomat duke mos ia mveshur vetëm Kurtit përgjegjësinë e mosarritjes së një marrëveshjeje, ndonëse qartazi thotë më pas se ishte “Jo”-ja e tij që e pamundësoi një kompromis, siç dhe vetë Kurti e pohoi.
“Palët nuk u pajtuan për një zgjidhje. Të dy mbajnë përgjegjësi të plotë për dështimin e bisedimeve sot dhe për çdo përshkallëzim dhe dhunë që mund të ndodhë në terren. Për hir të transparencës, ne parashtruam një propozim që mund ta shmangte këtë situatë të rrezikshme. Presidenti Vuçiç e pranoi, por për fat të keq kryeministri Kurti nuk e pranoi”, tha Borrell.
Ai më pas porositi qeverinë e Kosovës që të mos vazhdojë me fazën e dytë të planit për ndërrimin e targave, pra me vendosjen e gjobave, ndërsa qeverinë e Serbisë që të mos lëshojë më targa KM për serbët e Kosovës.
Tashmë pritet të shihet se ç’do ndodhë në terren, pasi të martën nis fazat e dytë, e gjobave, shtyrë me 24 orë për shkak të bisdimeve në Bruksel. /tesheshi.com/
