Përfaqësuesi i Lartë i Bashkimit Evropian (BE) për politikë të jashtme dhe siguri, Josep Borrell, tha se BE-ja është shumë e shqetësuar për forcimin e pranisë së ushtrisë serbe pranë kufirit me Kosovën, transmeton Anadolia.
“Dislokimi i ushtrisë përgjatë vijës kufitare administrative me Kosovën është shumë shqetësues dhe duhet ndalur menjëherë. Forcat duhet të tërhiqen”, tha Borrell të shtunën.
Shefi i diplomacisë së BE-së tha se BE-ja është duke diskutuar me partnerët dhe aleatët e saj situatën aktuale në veri të Kosovës, e cila mbi të gjitha kërkon deeskalim dhe stabilizim të situatës së sigurisë.
“Zbulimi i javës së kaluar i armëve dhe pajisjeve ushtarake është shumë serioz,” tha Borrell.
Shtetet e Bashkuara të Amerikës i bënë thirrje Serbisë të premten që të tërheqë trupat nga kufiri, duke e quajtur lëvizjen e tyre “një zhvillim shumë destabilizues”.
Borell pret që përgjegjësit për sulmin e 24 shtatorit të ndëshkohen dhe Kosova e Serbia të kthehen në dialog.
“Duhet t’i kthehemi situatës në të cilën palët po bisedojnë dhe t’i kthehemi dialogut me ndërmjetësimin e BE-së, e cila është platforma e vetme për normalizimin e marrëdhënieve mes Serbisë dhe Kosovës”, përfundoi Borrell. /tesheshi.com/
