Ministri i Jashtëm Evropian Josep Borrell tha të martën se Bashkimi Evropian po investon shumë para në Ballkanin Perëndimor dhe se nuk është e drejtë të thuhet se BE thjesht pretendon se do vendet nga rajoni në përbërjen e saj.
“Ne duam të ndihmojmë vendet e Ballkanit Perëndimor të afrohen me ne, për të hyrë në sistemin e BE. Nuk është e vërtetë që ne thjesht pretendojmë se duam që vendet e Ballkanit Perëndimor të bashkohen me BE. Këto vende kanë një të ardhme në BE, por këto vende duhet të bëjnë detyrat e tyre të shtëpisë: të zbatojnë reformat, të përmbushin standardet që zbatohen për të gjithë anëtarët,” tha ai si mysafir në një konferencë në internet të Aleancës Amerikane të Atlantikut.
Ai shtoi se Rusia, Kina dhe Turqia janë gjithashtu të pranishme në Ballkan dhe e paraqesin veten sikur kujdesen më shumë për Ballkanin Perëndimor sesa BE.
“Por ne po vazhdojmë procesin e zgjerimit, hap pas hapi. Regjimi pa viza është një realitet, mbase jo për të gjitha vendet e Ballkanit Perëndimor. Ne e kemi drejtuar dialogun midis Serbisë dhe Kosovës në rrugën e duhur. BE ndihmon Ballkanin shumë më tepër se të tjerët, por ne mund të mos jemi të mirë në propagandë. Nëntë miliardë euro është plani ynë ekonomik për Ballkanin Perëndimor,” theksoi Borrell.
Ai tha se blloku evropian po investon shumë më shumë para sesa Kina, Rusia dhe Turqia në Ballkan, por se ata mund të duhet të shpjegojnë më mirë se çfarë dhe pse po bëjnë.
“Ne po ndihmojmë, por ne po kërkojmë reforma. Të tjerët nuk po shikojnë. Reformat që ne po kërkojmë nuk janë një modë, por u duhen këtyre vendeve dhe njerëzve të tyre, të tilla si, për shembull, çrrënjosja e korrupsionit. Eshtë për të ardhur keq nëse disa njerëz mendojnë se thjesht po shtiremi. Kjo nuk është e drejtë,” tha Borrell. /tesheshi.com/
