Boris Johnson, një politikan kontravers pro-Brexit, po shfaq ambicie të forta në këtë fillimdetyre si kreu i diplomacisë britanike, duke tentuar të marrë një rol protagonisti, sidomos për zhvillimet në Lindjen e Mesme.
“Largimi i presidentit sirian, Bashar al-Assad nga vendi mbetet kyçi i zgjidhjes së konfliktit në Siri”, ka deklaruar ai së fundi, në prag të bisedimeve me homologët e tij amerikanë dhe evropianë.
Johnson pritet të takohet me sekretarin John Kerry si edhe me homologët gjermanë, francezë dhe italianë.
Johnson dhe Kerry kanë planifikuar edhe takime me ministrat e Jashtëm të Arabisë Saudite dhe të Emirateve të Bashkuara Arabe për çështjen e Jemenit.
“Duhet të jemi më aktivë, më bashkëpunues dhe më praktikë dhe kjo është arsyeja që unë jam i lumtur të kem këtë mundësi për të ftuar homologët e mi në Londër për takime të rëndësishme mbi konfliktet në Siri dhe Jemen”, tha Johnson.
“Do të qartësoj idenë time sipas së cilës vuajtja e popullit sirian nuk do të mbarojë derisa Assadi të jetë në pushtet. Komuniteti ndërkombëtar, përfshirë Rusinë, duhet të jetë i një mendjeje për këtë”, shtoi sekretari i Jashtëm britanik. /tesheshi.com/
