Pak para largimit nga detyra, Boris Johnson përfshiu emrin e babait të tij Stanley në listën e njerëzve që ai dëshiron të nderohet, sipas The Times.
Propozimi konkret nga ana e ish-kryeministrit të Britanisë u bë pas njoftimit të dorëheqjes së tij shtatorin e kaluar. Në MB është zakon sa herë që një kryeministër jep dorëheqjen të paraqesë një listë të quajtur “Nderimet e dorëheqjes”. Këtu përfshihen personat të cilëve ai dëshiron t’u jepen nderime dhe tituj të ndryshëm fisnikërie nga monarku përkatës.
Ndërsa disa kryeministra britanikë në të kaluarën kanë zgjedhur të mos dorëzojnë një listë të tillë pasi të japin dorëheqjen – veçanërisht në rastet kur është rezultat i skandalit – Johnson ka hartuar një listë që është “dukshëm më e gjerë” se ato të paraardhësve Theresa May dhe David Cameron.
Në mesin e afro 100 emrave të të zgjedhurve të Johnson, sipas gazetës britanike, është edhe ai i babait të tij, të cilin kryeministri i dorëhequr thuhet se synonte të merrte titullin kalorës.
I pyetur për raportin e Times, një zëdhënës i Boris Johnson tha se nuk do të kishte asnjë koment mbi përmbajtjen e listës.
Sipas Guardian, dhënia e çdo titulli nderi për Stanley Johnson do të rezultojë që Boris Johnson të jetë edhe një herë objektivi i kritikave. Siç kujton edhe gazeta, në vitin 2020 kryeministri i atëhershëm i Britanisë kishte propozuar vëllanë e tij, Joe Johnson, për një titull tjetër fisnikërie.
Në vitin 2021, deputetja konservatore Carolyn Noakes dhe një gazetare akuzuan publikisht ish-deputetin Stanley Johnson se i kishte prekur në mënyrë të papërshtatshme në konferencat e partisë. /tesheshi.com/
