Shefi i politikës së jashtme të BE-së Josep Borrell tha në selinë e OKB-së të premten se “askush”, madje as SHBA, “nuk është në gjendje të ndalojë” kryeministrin izraelit Benjamin Netanyahu në luftërat me Hamasin në Gaza dhe Hezbollahun në Liban.
“Ne po ushtrojmë të gjithë presionin diplomatik për një armëpushim. Por askush nuk duket i aftë ta ndalojë Netanyahun as në Gaza, as në Bregun Perëndimor”, tha Përfaqësuesi i Lartë i BE-së para gazetarëve pas takimit të Këshillit të Sigurimit të OKB-së.
Më herët, nga foltorja e Asamblesë së Përgjithshme të OKB-së, kryeministri izraelit kërcënoi se do të godiste Iranin nëse vendi i tij sulmohej, ndërsa u zotua se do të vazhdonte sulmet kundër Hamasit palestinez në Gaza dhe Hezbollahut pro-iranian në Liban derisa të arrinte fitoren.
Forcat e Armatosura izraelite (IDF) filluan një breshëri sulmesh ajrore gjatë natës së premte deri të shtunën në periferitë jugore të Bejrutit dhe zona të tjera të Libanit, disa orë pasi sulmi kishte në shënjestër “shtabin” e Hezbollahut.
Përshkallëzimi ka shkaktuar shqetësim ndërkombëtar. “Ne po shkojmë drejt një lufte të gjatë,” parashikoi Borrell, i cili të hënën paralajmëroi se Libani ishte “në prag të luftës totale”.
Pak javë para zgjedhjeve presidenciale në SHBA, ku do të përballen Kamala Harris dhe Donald Trump, situata në Lindjen e Mesme kërkon mobilizimin e komunitetit ndërkombëtar, thekson shefi i diplomacisë evropiane. “Ne nuk mund të mbështetemi vetëm në SHBA. Ata janë përpjekur shumë herë dhe kanë dështuar”, shtoi ai. /tesheshi.com/
