Dramaturgu kosovar Jeton Neziraj tha për median e Novi Sadit se “shpirtrat e luftës kudo rreth nesh janë gati të hidhen në një luftë tjetër”.
Shfaqja e tij në anglisht, “Balkan Bordello”, me regji të bashkëshortes së tij Blerta Neziraj, pati premierën serbe këto ditë në Atelier 212 të Beogradit.
“Atë që e kishim në vitet e 90-ta, ai Agamemnoni i etur për luftë dhe gjak, ai është ende i pranishëm në një mënyrë apo tjetër”, ka komentuar Neziraj.
Shfaqja u shfaq premierë në fillim të nëntorit në Prishtinë, dhe i referohet luftërave të viteve 1990 në Ballkan. Është bashkëprodhuar nga Qendra Teatrore nga Prishtina, Atelje 212 nga Beogradi dhe La MaMa Theatre nga New York-u.
“Kjo shfaqje në fakt flet për një shoqëri të traumatizuar, e cila ha vetëm vetveten. E kundërshton luftën si një makineri shkatërrimi, ku jeta dhe normaliteti kapitullojnë para të këqijave njerëzore”, thotë Neziraj.
“Gjërat nuk kanë ndryshuar shumë” në krahasim me vitet 1990
Neziraj thotë se shfaqja i referohet luftërave të viteve 1990 dhe sipas tij, “sot jemi dëshmitarë që gjërat nuk kanë ndryshuar shumë dhe shfaqja është një lloj thirrje për t’i dhënë fund këtij rrethi vicioz dhune”.
“Vetë shtylla kurrizore e shfaqjes është humori i zi në kontakt me vetë thelbin e temperamentit ballkanik. Aty përshkruhet sëmundshmëria e shpirtit njerëzor, ku del në pah marrëzia dhe naiviteti i një epoke të ndërtuar mbi dhunën, intolerancën dhe urrejtjen”, shpjegon Neziraj.
Kasti përbëhet nga dhjetë aktorë, shtatë nga New York-u, dy nga Serbia dhe një nga Kosova. Dhe pjesa tjetër e ekipit përbëhet nga njerëz nga e gjithë bota.
Pas Prishtinës dhe Beogradit, një sagë për familjet ballkanike e bazuar në trilogjinë e Orestit të Eskilit duhet të shfaqet në New York në fillim të prillit të vitit të ardhshëm. /tesheshi.com/
