I urryeri nga opozita dhe njëherësh njeriu të cilin Meta ka vendosur të mos e qasë në Presidencë, ambasadori i OSBE-së Bernd Borchardt, përshëndetin uljen e opozitës jashtësistemit në tryezën e Reformës Zgjedhore, duke kujtuar pikëpërpikë se cilat janë rekomandimet për një reformë të procesit.
“Javën e shkuar mirëpritëm vendimin e opozitës jashtëparlamentare për t’u riintegruar në procesin e diskutimit kombëtar me institucionet. Kjo gjë mund të përmbushë rekomandimin e parë kryesor të OSBE/ODIHR-it, që thotë: ‘partitë politike duhet të angazhohen në një dialog të hapur dhe gjithëpërfshirës dhe të lehtësojnë reformën zgjedhore’. Ne jemi shumë të lumtur që u bë një hap në këtë drejtim”, tha Borchardt, duke përmendur disa nga pikat që do hanë debat mes palëve, por që ai kërkoi kompromis edhe për shkak të kohës së kufizuar.
“Shqyrtimi i të gjithave deri më 15 mars do të jetë një sfidë e vështirë, pasi tashmë jemi në janar. Unë u uroj të gjithë aktorëve të përfshirë fat, dëshirën për të bërë kompromis, si edhe shumë energji”, tha diplomati gjerman.
Por më interesante në fjalën e tij, qe një lloj këshille, e cila godiste disa politikanë me xanxën e të korruptuarit, adresuar aty ku ulëritet më shumë, por dhe ku ai urrehet më shumë: me gjasë te LSI-ja.
“Ekziston një e vërtetë e thjeshtë, edhe në sektorë të tjerë: Nëse dëshiron të ndalosh korrupsionin, duhet të ndalosh së qeni i korruptuar. Legjislacioni ekzistues mund të prodhojë zgjedhje të përshtatshme dhe rezultate të besueshme. ODIHR-i e ka theksuar këtë në disa raporte. Kjo nuk ka ndodhur pasi bëhet korrupsion dhe autorët e tij e dinë se sistemi nuk mundet t’i dënojë apo thjesht nuk i dënon sa duhet. Mund të vijoni të përpiqeni të ndryshoni sistemin, por do të ishte më mirë të ndryshonit sjelljen. Ky është parakushti për mbarëvajtjen e gjithçkaje. Sepse nëse shkelësit e ligjit nuk ndryshojnë sjelljen, reformat bëhen të kota”, përfundoi Borchardt. /tesheshi.com/
