Nga Blendi Gashi
Bora e parë e vitit 2016 ka zënë në “gjumë” autoritetet kompetente të kryeqytetit Prishtinë dhe qyteteve tjera të Kosovës.
Rrugët me ngrica dhe të papastruara nga bora u kanë shkaktuar kokëçarje shumë vozitësve në mbarë vendin të cilët në disa raste nuk kanë arritur të kontrollojnë makinat e tyre, me ç’rast janë shkaktuar përplasje.
Dhjetëra vetura janë përplasur në orët e mbrëmjes njëra me tjetrën si pasojë e akullit që është krijuar në rrugën “Isa Kastrati” në Prishtinë.
Shumë qytetarë, sidomos nga kryeqyteti por edhe nga qytete të tjera të vendit, përmes postimeve në profilet e tyre në Facebook kanë shprehur shqetësimin për mos pastrimin e rrugëve.
Komuna e Prishtinës: Bëni kujdes të shtuar!
Komuna e Prishtinës përmes një deklarate ka njoftuar të gjithë qytetarët se po punon pa pushim në pastrimin e rrugëve të qytetit nga bora, në mënyrë që ato të jenë të qarkullueshme për komunikacion
Të gjashtë kompanitë e kontraktuara i kanë të gjitha ekipet e tyre në teren.
“Për shkak të intensitetit të madh të reshjeve të bores, sa po pastrohen rrugët po mbulohen sërish, andaj këto ekipe do të punojnë edhe gjatë natës. Po ashtu, temperaturat e ulëta po i bëjnë rrugët të rrëshqitshme, me ç’rast as kripa nuk po mjafton, andaj ekipet kanë filluar të hedhin edhe rërë”, thuhet në kumtesë.
Komuna e Prishtinës u bën thirrje vozitësve që të kenë kujdes të shtuar dhe mos të dalin në rrugë pa goma të dimrit dhe pajisje tjera dimërore.
Policia njofton: Janë bllokuar dy rrugë në Prishtinë
Policia e Kosovës përmes një njoftimi për media ka kërkuar kujdes të shtuar për shkak të reshurave të borës.
Po ashtu Policia ka njoftuar se janë bllokuar dy rrugë në Prishtinë për shkak të reshurave
“Ju njoftojmë se me datë 03.01.2016 në orët e vona të mbrëmjes nga të reshurat e borës në kryeqytet, janë krijuar vështërsi në qarkullimin e automjeteve në komunikacion dhe për shkaqe sigurie njësitë policore kanë bllokuar rrugët më të rrezikuara nga aksidentet e trafikut. Njësitë në teren kanë bllokuar rrugën “Eqrem Qabej” dhe rrugn “Isa Kastrati” .
Policia më tej rekomandon që të shtohet vigjilenca nga të gjithë pjesëmarrësit në komunikacion dhe të respektohen rregullat që dalin nga ligji mbi komunikacionin rrugor.
Ish-deputeti Tahiri: S’ka kush kujdeset për rrugët e Prishtinës
Ish-deputeti i LDK-së, Xhafer Tahiri ka postuar në llogarinë e tij në Facebook një fotografi ku sipër saj thotë se në lagjen Mati 1, rruga nuk është e pastruar pas reshjeve të borës.
“Bora e parë zemrën e mendjen ja u zbardhtë. Sa për rrugët e Prishtinës s’ka kush kujdeset (foto në lagjen Mati)! Me siguri janë tu marr me çashtje ‘madhore’. Kryene punën tuaj. Mos i tregoni ambasadorit me një jetë shërbim në diplomacinë amerikane si me ba punën e vet. Hallall mos ju koftë”, ka shkruar Tahiri.
Në linkun më poshtë mund të shikoni një video të aksidenteve të shkaktuara nga reshjet e borës në rrugët e Prishtinës:
https://www.youtube.com/watch?v=M4jDG3fMYb4
(tesheshi.com)
