Bora që ka nisur orët e mbrëmjes dhe në ultësirën shqiptare, ka kapur në befasi shumë drejtues automjetesh, gjë që ka sjellë bllokime aksesh, e sigurisht dhe rrëshqitje apo dalje makinash nga rruga, të papërgatitura për situatën.
Ndaj, Policia Rrugore ka këshiluar moslëvizjen e panevojshme, ose në të kundërt lëvizjen me zinxhirë
“Nisur nga moti i keq me reshje shiu pothuaj në të gjithë akset rrugore të vendit dhe reshjet e borës në zonat malore, Policia Rrugore tërheq vëmendjen e të gjithë drejtuesve të mjeteve, sidomos atyre që qarkullojnë në zonën e Dajtit, në Fushë Labinot, në Qafë Plloç, në Pogradec, Korçë, Dibër, Kukës, Lezhë, Llogara e Qafë Muzinë, për kujdes të shtuar gjatë drejtimit të mjeteve.
Shërbimet e Policisë Rrugore në të gjithë vendin ndodhen në shërbim 24 orë, në të gjitha akset rrugore kryesore, për të drejtuar qarkullimin rrugor, me qëllim parandalimin e çdo aksidenti sado i vogël të jetë ai, si dhe për t’i ardhur në ndihmë çdo drejtuesi mjeti që mund të ketë probleme.
Policia e Shtetit u bën thirrje të gjithë përdoruesve të rrugës që të shmangin lëvizjet e panevojshme në rrugë, të tregojnë kujdes maksimal dhe të përdorin zinxhirët e gomave për automjetet, sidomos në akset rrugore me deborë dhe me ngrica.
Shërbimet e përforcuara të Policisë Rrugore po monitorojnë trafikun edhe në qendrat e banuara, ku prezenca e ujit ka sjellë ngadalësim të trafikut dhe bllokim të përkohshëm të qarkullimit.
E gjithë situata po monitorohet në bashkëpunim me shërbimet e tjera të Policisë së Shtetit dhe me Emergjencat Civile, për të evituar ngjarjet rrugore dhe për të siguruar qarkullimin normal të mjeteve dhe të mallrave”, thuhet në njoftimin e Rrugores.
Një apel mbërriti dhe nga ministrja Balluku e ndodhur në terren:
“Situata e ekstreme e motit kerkon vemendje nga te gjithe. Duhen evituar qarkullimet e panevojshme ne akset kombetare nga drejtuesit e automjeteve dhe te perdoren zinxhiret ne ato zona ku kerkohen per arsye sigurie
Duke nisur nga sot ne oren 20.00 deri te henen ne oren 08.00 do te ndalohet qarkullimi i automjeteve te tonazhit te rende per shkak te bllokimit qe krijojne per borepastrueset.
I bejme thirrje per mirekuptim dhe bashkepunim te gjithe drejtuesve te automjeteve dhe i sigurojme se po punohet pa pushim ne cdo aks te goditur nga moti ekstrem.” /tesheshi.com/
