“Boom-i i kanabisit në Shqipëri”. Shërbimi Radio 4 i BBC-së i ka kushtuar një reportazh me këtë titull situatës më të fundit në Shqipëri me kultivimin dhe trafikimin e lëndëve narkotike, situatë që në vendin tonë është përcjellë me polemika, ku disa e shohin vërtet si një “boom” e të tjerë si një situatë normale që ka ekzistuar edhe më herët. Por në këndvështrimin e gazetareve të BBC-së, Albana Kasapi, Linda Pressly që kanë hetuar fenomenin, duket se Shqipëria është bërë prodhuesja më e madhe në Europë e kanabisit të rritur në fushë.
“Kjo industri e paligjshme, që menaxhohet nga grupe të krimit të organizuar, ka nisur në fund të viteve 1990 dhe është zgjeruar në të gjithë këtë shtet të vogël ballkanik. Pjesa më e madhe e ‘të gjelbrës së artë” trafikohet jashtë vendit, ndërsa fshatra të tërë varen nga paratë që prodhohen prej saj. Qeveria shqiptare po përpiqet ta frenojë industrinë duke eleminuar me miliona bimë, dhe duke kapur sasi të përmasave industrial bimësh të thata që përgatiten për të dalë në treg në vendndodhje të fshehta”, thuhet në përmbledhjen e reportazhit në faqen online të radio 4 të BBC-së.
Program pritet të transmetohet shpejt në valët e radios, në një hetim të zgjeruar që i shtohet reportazheve të njëpasnjëshme të medias ndërkombëtare për kanabisin në Shqipëri, ndër të cilat titulli i “Corriere della Sera” që e përcaktonte vendin tonë si “serrën gjigande të kanabisit” në Ballkan. /tesheshi.com/
