Një atentat i rëndë është shmangur në Paris, ku ndodhej një ministër i qeverisë shqiptare, një deputet i opozitës dhe zyrtarë të tjerë të shtetit shqiptar.
Policia franceze ka bërë të ditur se ka arritur të shmangte një atentat me bombë që do të vendosej në sallën ku po zhvilloheshin punimet e samitit të lartë të opozitës iraniane në Paris, ku përveç disa politikanëve shumë të njohur botërorë, ndodhej edhe ministri i Diasporës, Pandeli Majko, deputeti Fatmir Mediu dhe deputetja Elona Gjebrea.
Siç bën të ditur në një komunikatë, NCR – Këshilli i Rezistencës së Iranit: “Mes të arrestuarve është Asadollah Assadi, kreu i inteligjencës së mullahëve në ambasadën e regjimit iranian në Vjenë dhe koordinimit të terroristëve në Gjermani”.
Sipas një deklarate të përbashkët nga prokurori federal belg dhe agjensia federale e inteligjencës dhe sigurisë, një çift i lidhur me regjimin iranian të cilët ishin ngarkuar me kryerjen e një sulmi terrorist kundër Mbledhjes së Madhe të Rezistencës Iraniane në Paris më 30 qershor, janë arrestuar në Belgjikë, dhe gjyqtari nxori një urdhër arresti kundër tyre.
Sipas deklaratës, atyre u është gjetur rreth 500 gramë material TATP dhe një mekanizëm detonimi futur në një çantë tualeti grash. Sipas kësaj deklarate, një person i dyshuar për bashkëpunim me dy individët e sipërpërmendur është arrestuar njëkohësisht në Francë. Deklarata shton se një diplomat iranian nga ambasada e regjimit iranian në Vienë, i cili sipas policisë ishte koordinuesi i terroristëve të arrestuar, është arrestuar gjithashtu në Gjermani.
Çifti që u arrestua në një Mercedes-Benz në qytetin Antverp, Belgjikë, përbëhej nga Amir Sadouni 38 vjeç dhe Nasim Naami 34 vjeç, të cilët pretendonin sikur ishin mbështetës të muxhahidinëve PMOI. Ata kishin shtetësi belge.
Amir Sadouni punonte në një kompani transporti që operon midis Hollandës dhe Belgjikës dhe udhëtonte fshehtazi për në Iran. Nasim Naami shkoi në Belgjikë nga Irani në 2009 dhe u martua me Sadouni-in.
Diplomati i arrestuar në Gjermani është Asadollah Assadi, 47 vjeç, i cili ka qenë kreu i stacionit të inteligjencës së regjimit iranian në ambasadën iraniane në Vienë që nga viti 2014.
Ai u kishte dhënë urdhrin final bashkëpunëtorëve për të sulmuar mbledhjen e 30 qershorit.
Asadollah Assadi kishte zëvendësuar një tjetër diplomat të regjimit me emrin Mostafa Roudaki.
Mostafa Roudaki shkoi në Teheran nga Austria, dhe u dërgua në Shqipëri në vitin 2017 si sekretar i parë i ambasadës.
Sipas muxhahidinëve opozitarë, ai u dërgua në mënyrë që të merrej me spiunazh dhe veprimtari terroriste kundër PMOI.
Opozita iraniane akuzon Teheranin se për të lehtësuar veprimtaritë e Roudaki-it, Qendra Habilian dhe Shoqata Didehban, dy degë të Ministrisë së Inteligjencës (MOIS), u bënë aktive në Shqipëri nën maskën e veprimtarive kulturore dhe të shtypit.
Personi që është arrestuar në Francë si i dyshuar për bashkëpunim me terroristët është Mehrdad Arefani, 55 vjeç. E shoqja, e cila është ndarë prej tij, ka qenë e lidhur me një oficer inteligjence në Iran.
Policia belge ka hetuar pesë vende të tjera në pjesë të ndryshme të Belgjikës
Rezistenca Iraniane kishte paralajmëruar vazhdimisht më përpara për përgatitjet terroriste nga diplomatët e mullahëve dhe mercenarët e Ministrisë së Inteligjencës (MOIS) si dhe Forcat Quds në vende të ndryshme europiane përfshirë Belgjikën.
Agjencitë europiane të inteligjencës, në raportet e tyre vjetore, kanë theksuar vazhdimisht se PMOI dhe Këshilli Kombëtar i Rezistencës së Iranit janë shënjestra kryesore e Ministrisë së Inteligjencës dhe Brigadës Quds.
Bashkimi Europian më 29 prill, 1997, urdhëroi që trupat e general Sulejmanit si dhe agjentët e tyre të inteligjencës dhe sigurisë të përjashtoheshin nga Shtetet Anëtare dhe të mos lejoheshin të hynin në asnjë nga këto vende.
Lidhur me këtë çështje, Rezistenca Iraniane bëri thirrje për mbylljen e ambasadave dhe agjensive të regjimit të Iranit.
Sipas opozitës “ambasadat janë kthyer në qendra të terrorizmit dhe spiunazhit. Opinioni publik duhet të jetë plotësisht i informuar rreth komploteve terroriste të regjimit të mullahëve. Kjo është e nevojshme për të garantuar sigurinë e refugjatëve dhe disidentëve iranianë”. /tesheshi.com/
