Një ngjarje e rëndë ka ndodhur në Podgoricë, ku një person ka hedhur një bombë dore në ndërtesën e ambasadës amerikane në Mal të Zi. Atentatori më pas ka shpërthyer një tjetër granatë në dorën e tij dhe ka hedhur veten në erë.
Incidenti ka ndodhur gjysmë ore pas mesnatës.
Siç bën të ditur gazeta më e madhe e Podgoricës, Vijesti, qeveria malazeze thotë se po zhvillon me shpejtësi hetimet për zbardhjen e ngjarjes.
Zëdhënësi i ambasadës së SHBA-së në Podgoricë, Jeff Adler tha për Vijesti-n se ata janë duke punuar me policinë për të identifikuar sulmuesin.
“Ambasada po kryen një procedurë të brendshme së bashku me stafin e sigurisë së brendshme”, tha Adler.
Për ngjarjen është alarmuar edhe Departamenti Amerikan i Shtetit.
Siç bën të ditur New York Times, nënsekretari i Departamentit të Shtetit, Steve Goldstein tha se dëshmitarët panë një burrë duke hedhur një objekt me murin e ambasadës.
Të dhënat bëjnë të ditur se askush nuk u plagos nga punonjësit e ambasadës amerikane.
Goldstein ka shtuar se zyrtarët e sigurisë nuk kanë gjetur pajisje të tjera shpërthyese dhe se ndërtesa nuk është dëmtuar nga sulmi.
Ende nuk dihet mbi motivin e sulmit.
Ambasada, në një njoftim ka këshilluar qytetarët amerikanë të shmangin ardhjen aty deri në një njoftim të ri. /tesheshi.com/
