Një gjykatës amerikan ka urdhëruar Iranin që të paguajë 1.45 miliardë dollarë familjes së një ish-agjenti të FBI-së që besohet se ishte rrëmbyer nga autoritetet iraniane gjatë një misioni të paautorizuar të CIA-s në ishullin Kish.
Familja e Robert Levinson dhe qeveria e Shteteve të Bashkuara besojnë se ish-agjenti vdiq ndërsa ishte në paraburgim në Iran.
Irani i ka mohuar prej kohësh këto akuza, megjithëse zyrtarët e vendit herë pas here japin shpjegime kontradiktore për atë që i ndodhi në ishullin Kish.
Gjykata në Uashington vendosi që Irani është i detyruar t’i paguajë familjes Levinson 1.45 miliardë dollarë kompensim për rrëmbimin e tij, raporton AP.
Gjykatësi tha se Irani e mbajti ish-agjentin special të FBI-së dhe DEA-s në robëri dhe e torturoi atë për 13 vjet, duke theksuar se autoritetet e këtij vendi ende refuzojnë të pranojnë përgjegjësinë për këtë akt.
Zyrtarët iranianë dhe media shtetërore nuk komentuan menjëherë mbi vendimin e gjykatës amerikane, në të cilën Irani nuk kishte asnjë mbrojtje.
Tensionet midis Shteteve të Bashkuara dhe Iranit nuk po humbin intensitetin, për shkak të presionit maksimal nga Presidenti Trump mbi programin bërthamor të Iranit. /tesheshi.com/
