Vetëm pak ditë pas testeve bërthamore të kryera nga Koreja e Veriut, amerikanët e kanë demonstruar forcën dhe vendosmërinë e tyre nëpërmjet fluturimit në një lartësi të ulët të një bombarduesi B-52 në Korenë e Jugut.
I shoqëruar nga një avion F-16 amerikan dhe nga një tjetër F-15 koreanojugor, ai është ngritur nga baza në Guam dhe ka fluturuar mbi bazën ajrore Osan këtë të dielë.
Osani gjendet në jug të Seulit, gati 100 kilometra nga kufiri me Korenë e Veriut, ndaj fluturimi i bombarduesit gjigand B-52, që është në gjendje të mbajë dhe armë bërthamore, ka qenë i menduar mirë.
Sipas forcave ushtarake amerikane, fluturimi ishte në përgjigje të aksionit të fundit provokativ të Koresë së Veriut.
“Fluturimi sot demonstron aftësinë dhe fuqinë e aleancës,” i ka thënë agjencisë Reuters shefi i dislokimit amerikan në Korenë e Jugut, gjeneral Curtis Scaparrotti. /tesheshi.com/
