Një sulm ajror mbi një kamp refugjatësh në provincën e Idlibit ka lënë të vrarë më së paku 30 persona, mes të cilëve ka gra e fëmijë. Dhjetëra të tjerë janë të plagosur.
Sipas Observatorit Sirian për të Drejtat e Njeriut, numri i të vdekurve në kampin e refugjatëve pranë kufirit me Turqinë pritet të rritet, për shkak të gjendjes kritike të shumë prej të plagosurve.
Bombardimet u kryen një ditë më parë, pasdite, mbi kampin në Sarmada, ku janë strehuar sirianë të zhvendosur brenda vendit.
Raportohet se sulmi mund të jetë kryer nga avionët luftarakë sirianë apo rusë, por nuk ka ende një konfirmim përfundimtar.
Një marrëveshjes mes Rusisë dhe SHBA-ve ka mundësuar një armëpushim të pjesshëm, por Idlibi nuk është pjesë e tij.
Sulmi i djeshëm mbi civilët është më i fundit në një seri të gjatë sulmesh të tilla gjatë dy javëve të fundit, posaçërisht në Halep.
Rreth 300 persona kanë humbur jetën nga sulmet ajrore dhe bombardimet. /tesheshi.com/
