Pasi një armëpushim i shkurtër njëjavor mori fund në Siri, luftimet janë kthyer rrëmbyeshëm në vendin e mbërthyer nga konflikti i përgjakshëm.
Observatori Sirian për të Drejtat e Njeriut, një ndjekës i afërt i zhvillimeve në terren, thotë se së paku 32 persona janë vrarë gjatë dhjetëra sulmeve ajrore në Halep dhe rreth tij me të marrë fund armëpushimi.
Përpos kësaj, nga bombardimet ajrore është goditur një autokolonë me ndihma e OKB-së. Nga sulmi kanë mbetur të vrarë 12 persona, e janë shkatërruar 18 kamionë plot me ndihma, të nisur për në një zonë të kontrolluar nga kryengritësit në perëndim të Halepit. Sipas njoftimeve të para, shumica e të vrarëve ishin shoferë të Gjysmëhënës së Kuqe Siriane.
I dërguari i posaçëm i OKB-së për Sirinë, Staffan de Mistura, ka reaguar dukshëm i nervozuar, “Zemërimi ynë për këtë sulm është i jashtëzakonshëm. Autokolona ishte rrjedhojë e një procesi të gjatë përgatitjesh dhe lejesh për t’u ardhur në ndihmë civilëve të izoluar.”
Amerikanët kanë fajësuar Rusinë për sulmin mbi autokolonën, edhe nëse avionët rusë nuk kanë qenë pjesë e bombardimeve. Sipas SHBA-ve, Rusia ishte përgjegjëse në kuadër të marrëveshjes së armëpushimit për frenimin e forcave qeveritare siriane.
Zëdhënësi i Departamentit Amerikan të Shtetit, John Kirby, do të shprehej në një deklaratë: “Vendmbërritja e kësaj autokolone ishte e ditur për regjimin sirian dhe për federatën ruse, e megjithatë këta punonjës ndihmash u vranë në përpjekjen e tyre për t’i dhënë ndihmë popullit sirian.”
“SHBA-të do ta ngrejnë këtë çështje në mënyrë të drejtpërdrejtë me Rusinë. Duke patur parasysh shkeljen e madhe të ndërprerjes së luftimeve, ne do t’i rishohim mundësitë e ardhshme për bashkëpunim me Rusinë,” ka shtuar Kirby.
Një zyrtar tjetër i lartë amerikan, emri i të cilit nuk bëhet i ditur, e bëri të qartë se vendi i tij bën përgjegjës para së gjithash Rusinë.
“Ne nuk e dimë tani nëse ishin rusët apo ishte regjimi. Në çdo rast, rusët kanë sigurisht përgjegjësinë për të mos ndërmarrë vetë veprime të tilla, por kanë gjithashtu përgjegjësinë për të mos e lënë regjimin ta bëjë këtë,” ishte ajo çka tha zyrtari amerikan. /tesheshi.com/
