Halepi ndodhet prej tetë ditësh nën bombardim të vazhdueshëm, çka i ka detyruar autoritetet fetare vendore të anulojnë mbledhjen e njerëzve nëpër xhami për të kryer faljen e së premtes.
Eshtë hera e parë që në Halep anulohet falja e xhumasë, një masë e marrë në kushtet e një pasigurie të jashtëzakonshme.
Një deklaratë e përbashkët e këshillave fetarë në tërë Halepin thotë mes të tjerash:
“Për herë të parë në qytetin më të vjetër të botës, në qytetin islam të Halepit, këshillat fetarë kanë vendosur të anulojnë faljen e xhumasë për shkak të luftës brutale mbi jetën njerëzore. Kjo është një masë për t’i shpëtuar njerëzit, të bërë një objektiv i regjimit…”
Xhamive të qytetit iu kërkua t’i mbanin dyert e mbyllura sot në mesditë, në të tetën ditë të bombardimeve, që nuk kanë kursyer as spitalet e objektet e kultit.
Besimtarët u këshilluan të qëndrojnë në shtëpi e të kryejnë faljen rituale.
“Jemi të brengosur për këtë…, por kjo është për ta shpëtuar popullin tonë,” thuhet në njoftimin.
Anulimi i faljes të së premtes ndodh për herë të parë në Halep që prej fillimit të luftës. /tesheshi.com/
