“Bombat” e PD-së dje me të quajturin përgjim të vëllait të ministrit të Brendshëm Fatmir Xhafaj, kanë përfunduar në Prokurorinë e Përgjithshme.
Agron Xhafaj, i vëllai i ministrit i akuzuar se është përgjuar gjatw njw bisede me një trafikant, ka deklaruar se përgjimi është i rremë dhe ka paditur tre deputetët e PD-së: Ervin Salianji, Enkelejt Alibeaj dhe ish-ministrin e Drejtësisë, Gazmend Bardhi.
Por ditën e djeshme, ajo që ka rënë në sy në qarqet e opozitës ka qenë një lojë ku është përhapur një lajm sikur Fatmir Xhafaj i ka paraqitur dorëheqjen kryeministrit Edi Rama.
Për mbi 10 orë lajmi ka qarkulluar në portalet pranë opozitës dhe vetëm natën vonë, zëdhënësi i Xhafajt deklaroi zyrtarisht se “Ministri i Brendshëm është në detyrë e nuk është larguar”.
Por ç’ka ndodhur dhe çfarë synonte loja e djeshme?
Sipas burimeve diplomatike, Fatmir Xhafaj ka pasur një takim me disa diplomatw të rëndësishëm perëndimorw ku ka rrëfyer gjithçka mbi akuzat e PD-së, ndërkohë që ka bërë të ditur se nëse ata shikonin shkelje ai është gati të largohej.
Pikërisht këto zëra janë përhapur në mënyrë virale në ambientet e opozitës dhe ka dalë lajmi i dorëheqjes.
Qëllimi sipas të gjitha gjasave ishte që Edi Rama të shkonte sot në Pallatin Elysee në Paris ku do të takojë Emanuel Macron-in, presidentin e Francës, i plagosur politikisht.
Megjithatë, kjo nuk ndodhi dhe kryeministri do të zhvillojë takimin me kreun e Elysee-së me shpresën se do të marrë nga atje një “Po” shumw më të qartë se nga Merkeli për hapjen e negociatave të BE-së.
Dhe pikërisht përpara këtij takimi, Lulzim Basha mori vendimin që të ndërpresë bojkotin e komisioneve të parlamentit që prej ditës së sotme.
Basha premtoi se nëse nuk do të ketë reagim nga Rama, pra të paktën largim të Xhafajt, do të ketë “zjarr” të enjten në Parlament.
Duket qartë se gjithçka u zhvillua për të “këputur telat” e nervave të Edi Ramës para takimit të Parisit, i cili është i dyti më i rëndësishmi pas atij të Berlinit.
Gjithçka do të varet nga ai mesazh që do të përcjellë Emanuel Macron.
Nëse presidenti francez “hap dritën jeshile”, atëherë Edi Rama do të vijë të premten i gatshëm për t’u “hakmarrë” ndaj opozitës për atë që i ka bërë këto ditë.
Selia rozë madje ka bërë gati publikimin e dy dosjeve të forta që pritet t’i cojë në Prokurori për korrupsion të figurave të larta të qeverive të PD-së.
Nëse mesazhi i Macron do të jetë i vakët ose negativ, pozita e Ramës sipas gjasave do të jetë më e dobët dhe ka shumë gjasa që edhe një tërheqje e Fatmir Xhafajt të mos mjaftojë… /tesheshi.com/
