Koreja e Veriut prej kohësh ka kërkuar një mënyrë për të dërguar një bombë atomike në Shtetet e Bashkuara, armiku i saj i betuar, dhe testi bërthamor i së dielës erdhi menjëherë pas raportimeve se ajo do të mund të ngarkojë një bombë hidrogjeni në një raketë balistike ndërkontinentale (ICBM).
Bombat e hidrogjenit, ose H-bombat, janë shumë më të fuqishme se sa armët relativisht të thjeshta atomike që Pheniani besohet të ketë testuar deri tani.
Në krahasim me bombën atomike, si ajo që u lëshua në Japoni nga SHBA-të në ditët e fundit të Luftës së Dytë Botërore, bomba me hidrogjen mund të jetë 1.000 herë më e fuqishme.
Tri testet e para bërthamore të Koresë së Veriut nga viti 2006 deri në 2013 ishin bomba atomike, afërsisht në të njëjtën shkallë me ato të përdorura në Hiroshima dhe Nagasaki, të cilat së bashku vranë më shumë se 200,000 njerëz.
Megjithatë, testi i së dielës vlerësohet të ketë qenë i një peshe rreth 100 kilotonë, 10 herë më i fortë se testi i vitit të kaluar që shkaktoi një tërmet me magnitudë 5.3.
Bomba me hidrogjen, e quajtur edhe bomba termonukleare, përdor bashkimin, ose bërthamat atomike që afrohen së bashku, për të prodhuar energji shpërthyese. Yjet gjithashtu prodhojnë energji përmes bashkimit.
Bomba atomike mbështetet në ndarjen e atomit, ashtu si edhe centralet e energjisë bërthamore.
Teknologjia e bombës me hidrogjen është më e sofistikuar dhe është një kërcënim më i madh. Ajo mund të prodhohet mjaft e vogël, sa për t’u përshtatur në kokën e një rakete balistike ndërkontinentale ICBM.
“Një raketë e tillë mund të zhdukë të gjithë qytetin e Nju Jorkut, askush nuk do të mbijetonte”, thotë Andrei Lankov, një profesor i studimeve koreane në Universitetin Kookmin në Seul, duke shtuar se “një bombë atomike mund të vrasësh më së shumti gjysmën e Manhatanit (lagje e Nju Jorkut)”.
Përveçse janë shumë më të fuqishme, H-bombat janë gjithashtu shumë më të kushtueshme.
“Për Korenë e Veriut që të ketë një pajisje kaq të fuqishme dhe të shtrenjtë është pak e tepruar, thjesht nuk ka kuptim. Është sikur të dalësh në dyqanin pranë dhe të blesh një Porsche. Është një program shumë i shtrenjtë, i cili nuk do të japë kontribut të madh për sigurinë e tyre, por qeveritë ndonjëherë bëjnë gjëra të çmendura”, tha Lankov.
Bomba me hidrogjen është standardi global për pesë vendet me aftësitë më të mëdha bërthamore: SHBA, Rusia, Franca, Britania e Madhe dhe Kina.
Kombe të tjera gjithashtu mund ta kenë atë, ose po punojnë në këtë drejtim, pavarësisht përpjekjeve mbarëbotërore për të ndaluar një përhapje të tillë.
Kune Y Suh, një profesor i inxhinierisë bërthamore në Universitetin Kombëtar të Seul, e quajti testin e së dielës një “ndërrues loje”.
“Koreja e Veriut në mënyrë efektive e ka pozicionuar veten si një shtet bërthamor. Kjo nuk është vetëm një ndërrim loje, kjo do të thotë ‘loja mbaroi’,” tha Suh.
Përgatiti Jeton Zenuni – /tesheshi.com/
