Zoran Zaev nuk do t`i kursejë as partitë shqiptare nga publikimi i informacione edhe për aktivitetin e paligjshëm të tyre, deklaroi në konferencën për shtyp, gjatë shpalosjes së “bombës” së dhjetë të përgjimeve.
“Kemi një strategji të kujdesshme. Asnjërin nuk do ta mbrojmë. Gjitha do t’i zbardhim. Nuk bëjmë dallim nëse është PDSH apo BDI”, tha Zaev, i cili kishte në shënjestër kryeminstrin Gruevski, respektivisht siç tha, smirën e tij për tu pasuruar në mënyrë të paligjshme.
Zaev publikoi bisedë telefonike e cila thotë se zhvillohet mes kryeministrit Gruevski dhe ministrit për Transport Janakievskit, e cila dëshmon për urdhërin e kryeministrit për të ndryshuar planet urbanistike në disa lokacione elite të Shkupit, me qëllim që t`i uzurpojë Gruevski me djalin e axhës, shefin e inteligjencës- Sasho Mijallkov si dhe njerëz tjerë. Këtë e kanë bërë përmes firmave “of shore” të regjistruara në Belize.
“Nuk bëhet fjalë vetëm për 4 banesat, as për metrat katrorë që ai në mënyra të çuditshme dëshironte t`i fitojë, as për shtëpinë shtesë të tij, por kjo “bombë” tregon për skandalet që ju me siguri e mbani mend, për miratimin e dy planeve të kontestueshme urbanistike në Tasino Çeshmiçe 1 dhe Kapishtec në Vodno. Në planin e parë urbanistik kontestuese janë objektet e Panoramës dhe dhjetë-katëshet. Por plani i dytë urbanistik fsheh diçka tjetër, dy lokacione atraktive të cilat i kanë pëlqyer Gruevskit dhe i ka uzurpuar. Sot vlera e tyre është mbi 10 milion euro.” tha Zaev. /tesheshi.com/
