Pak ditë pas humbjes shokuese ndaj Napolit, Bolonja e ka pësuar përsëri mbrëmë në shtëpi nga një tjetër ekip, nga Milani.
Të mundesh prej një ekipi të tillë nuk është dramë, por të mundesh nga nëntë lojtarë ndërsa ke një formacion të plotë, këtë trajneri i Bolonjës, ish-lojtari i mirënjohur i Milanit, Roberto Donadoni, e ka quajtur një skenar makthi.
Në takimin e prapambetur të Serisë mes Bolonjës dhe Milanit, udhëtuesit mbetën me dy lojtarë më pak pas daljes me të kuqe të Paletta-s në minutën e 36-të dhe të Kucka-s në minutën e 59-të.
Për çudi, në vend që ta shfrytëzojë këtë Bolonja, fitoren e siguron Milani, pas golit të Pasalic-it pak para mbarimit të lojës.
Donadoni mori përgjegjësinë për humbjen 0-1 mbrëmjen e së mërkurës.
“Ishte një skenar makthi. Në pjesën e dytë bëmë gjithçka që nuk duhej të bënim. Eshtë përgjegjësia ime.”
“Paguam për gabime naive, lejuam disa kuındërsulme absurde,” deklaroi trajneri i Bolonjës, ekipit që ka rrëshqitur në vend të 14-të në Serinë A pas së dhjetës humbje.
Në një tjetër takim të prapambetur, Juventusi fitoi 0-2 në fushën e Krotones, duke u ngjitur në kuotën e 57 pikëve, në vend të parë në klasifikim e me Romën shtatë pikë pas. /tesheshi.com/
