Bolivia ndërpreu marrëdhëniet zyrtare me Izraelin për shkak të luftës në Gaza, ndërsa dy vendet e tjera të Amerikës Latine thirrën ambasadorët e tyre në Tel Aviv për konsultime.
Bolivia “ka vendosur të prishë marrëdhëniet diplomatike me Shtetin e Izraelit si një shenjë e refuzimit dhe dënimit të ofensivës ushtarake agresive dhe disproporcionale izraelite që po ndodh në Rripin e Gazës”, tha zëvendësministri i Jashtëm Freddy Mamani në një konferencë për shtyp të martën mbrëma.
Ministrja Maria Nela Prada njoftoi gjithashtu se vendi do të dërgojë ndihma humanitare në Gaza.
“Ne kërkojmë t’u jepet fund sulmeve në Rripin e Gazës, të cilat deri më tani kanë shkaktuar mijëra viktima civile dhe zhvendosje të detyruar të palestinezëve,” tha ajo në një konferencë për shtyp.
Fqinjët Kolumbia dhe Kili ftuan gjithashtu ambasadorët e tyre për konsultime, duke dënuar vdekjen e civilëve në Gaza dhe duke bërë thirrje për një armëpushim.
Historikisht, vendet e Amerikës Latine me prirje të majtë kanë qenë simpatike për kauzën palestineze, ndërsa vendet e krahut të djathtë kanë prirur të ndjekin shembullin e Shteteve të Bashkuara të Amerikës.
Duke shkruar në rrjetin social X, presidenti kilian Gabriel Boriç akuzoi Izraelin për “shkelje të papranueshme të ligjit ndërkombëtar humanitar” dhe një politikë “dënimi kolektiv” të popullit të Gazës, pasi njoftoi tërheqjen e ambasadorit Jorge Carvajal.
Kili ka komunitetin më të madh dhe një nga më të vjetrat palestineze jashtë botës arabe.
Gjithashtu në Platformën X, presidenti kolumbian Gustavo Petro i quajti sulmet “një masakër ndaj popullit palestinez”.
Vende të tjera të Amerikës Latine, përfshirë Meksikën dhe Brazilin, kanë bërë gjithashtu thirrje për një armëpushim.
Kujtohet se Bolivia ndërpreu më parë marrëdhëniet diplomatike me Izraelin në vitin 2009, gjithashtu në shenjë proteste kundër veprimeve izraelite në Gaza. Marrëdhëniet u rivendosën vetëm në vitin 2020. /tesheshi.com/
