Nga Blendi Gashi
Edhe pse është ftuar të marrë pjesë në “Samitin 100”, në Shkup, i cili do mbahet të hënën, ku përveç mbi 150 udhëheqësve të bizneseve nga Evropa Juglindore, pjesëmarrës do jenë edhe kryeministra të vendeve të Ballkanit Perëndimor, Ramush Haradinaj, nuk ka shkuar në kryeqendrën maqedonase.
Ai ka njoftuar homologun e tij maqedonas, Zoran Zaev, nëpërmjet një letre, duke e arsyetuar mospjesëmarrjen për shkak të agjendës së ngjeshur.
E, në vend të Haradinajt, në “Samitin 100” në Shkup, Kosovën do ta përfaqësojë zv.kryeministri i parë i vendit, Behgjet Pacolli.
Në dallim nga Haradinaj, pjesëmarrjen në samitin e Shkupit e kanë konfirmuar kryeministrat e Shqipërisë, Edi Rama, ai i Malit të Zi, Dushko Markoviç, dhe kryesuesi i Këshillit të Ministrave të Bosnjes, Denis Zvizdiç.
A është Markoviç “fajtori” ?
Arsyeja e axhendës së ngjeshur për mungesën e pjesëmarrjes në samit, duket paksa e pabesueshme.
Qeveria përmes një njoftimi sqaron se Haradinaj nuk udhëton në Shkup për shkak të prioriteteve qeveritare në vend, por nuk tregon se cilat janë ato prioritete.
Ndërsa mohon kategorikisht se prezenca e kryeministrit të Malit të Zi, Dushko Markoviç, është arsyeja pse Haradinaj e bojkoti këtë takim të rëndësishëm.
“Mospjesëmarrja në Samitin e Shkupit e kryeministrit Haradinaj nuk ka të bëjë aspak me atë që disa media kanë aluduar, se ai nuk dëshiron të takojë kryeministrin e Malit të Zi”, thuhet në njoftimin e qeverisë, ndërsa nuk mohohet edhe mundësia që të vizitojë Malin e Zi.
“Kryeministri Haradinaj do t’i bëjë ftesë zyrtare për të vizituar Kosovën kryeministrit maqedonas, Zoran Zaev, dhe ai do ta vizitojë Shkupin në një të ardhme, por nuk e përjashton mundësinë e vizitës edhe në Podgoricë”, thotë qeveria.
Kujtojmë se kryeministri malazez ia ka shuar Haradinajt shpresat për rinegociim të marrëveshjes së Demarkacionit të kufirit ndërmjet vendit të tij dhe Kosovës.
Markoviç ka thënë javë më parë se Mali i Zi e ka kryer punën e vet sa i përket Demarkacionit.
“I kuptoj rrethanat në Kosovë, por Podgorica ka bërë të gjithën që është pjesë e saj dhe se për këtë çështje më nuk do të bisedohet qoftë edhe për një centimetër”, ka thënë Markoviç.
Ja për ç’aktivitete bojkoti Samitin…
Nga axhenda që Haradinaj pati sot, kuptojmë se ai bojkotoi Samitin për takime me deputet e ish-luftëtarë, të cilët mund t’i takonte kurdo, por dhe për takime të fushatës zgjedhore.
Haradinaj është takuar me deputetin e shumë përfolur kohëve të fundit Milaim Zeka me të cilin ka biseduar siç thuhet në njoftimin e qeverisë për temat e aktualitetit politik, për koalicionin qeverisës dhe për një dinamikë të re në qeverisjen e vendit.
Po ashtu ka takuar edhe ish-komandatin e UÇK-së Sami Lushtaku dhe djalin e tij Mërgimin i cili është tashmë deputet.
Në kumtesën e qeverisë thuhet se kryeministri me dy të lartpërmendurit ka biseduar për aktualitetin politik të vendit.
Në takim u bisedua për dinamikën e re që është instaluar në qeverisje, duke i dhënë prioritet zgjidhjes së temave të rënda, që janë neglizhuar nga qeverisjet e kaluara, si dhe bëhet e ditur se nuk janë lënë anash as tema e trajtimit të kategorive të luftës për liri, për çka kryeministri Haradinaj i njoftoi bashkëbiseduesit se ka ndërmarrë hapa dhe veprime konkrete, që veteranët dhe invalidët e luftës si dhe kategoritë tjera përfituese nga shteti, të mos presin me muaj pagat dhe pensionet e tyre.
Haradinaj po ashtu mori pjesë edhe në akademinë përkujtimore me rastin e 20-vjetorit të rënies së heroit të Kosovës, Adrian Krasniqi.
Gjatë ditës po ashtu është paraparë që Haradinaj të marrë pjesë në tubimin elektoral të kandidatit të AAK-së për kryetar të Prishtinës, Arbër Vllahiu i cili mban tubim me Klubin e Sportistëve. /tesheshi.com/
