Ngërçi politik i krijuar nga protesta e opozitës në bulevard dhe bojkoti i mundshëm i zgjedhjeve parlamentare të 18 qershorit, duket se kanë qenë në fokus të takimeve që ekipi amerikan i përbërë nga dy ambasadorët, Arvizu dhe Lu zhvilloi fillimisht me kreun e Opozitës Lulzim Basha e më pas edhe me kreun e Kuvendit, Ilir Meta.
Sipas zyrës së shtypit të kreut të Kuvendit, Meta nënvizoi se vendi ka nevojë për dialog e përgjegjshmëri për të garantuar zgjedhje të lira e të ndershme dhe për të avancuar reformat kyçe në vend, si ajo e sistemit të drejtësisë.
Ky takim vjen një ditë pas darkës mes kryeministrit Edi Rama dhe aleatit të tij në qeveri Ilir Meta. Më herët, Arvizu u takua me kreun e Partisë Demokratike Lulzim Basha. /tesheshi.com/
