Mbetet ende e paqartë nëse PD do hyjë apo jo në zgjedhjet e 18 qershorit. Pas një mbledhjeje të grupit parlamentar, kreu i kësaj partie, Basha, përveçse ka paralajmëruar një protestë më 13 maj, duke e cilësuar atë si “më të madhen”, tha se nuk është marrë ndonjë vendim për bojkot dhe se nuk do ketë bojkot, por që nga ana tjetër iu qas akuzave nga mazhorancës duke lënë të nënkuptuar se zgjedhjet do bojkotohen.
“Ato që do të organizohen me datë 18 qershor, nuk do të jenë zgjedhje, do të jenë votime të një koalicioni monist, të ndihmuara nga droga dhe nga krimi. E gjithë përpjekja jonë dhe e gjithë qytetarëve shqiptarë, është që 18 qershori, nëse nuk ka reflektim nga pala tjetër, të shënojë jo një votim fasadë të diktuar nga krimi dhe droga, por një sprapsje totale të krimit dhe drogës dhe çdo krahu politik përfaqësues të tyre, sepse me 18 qershor, votime moniste pa opozitën, me krimin dhe me drogën, nuk do të ketë.
Nuk do të ketë asnjë hap të askujt që do të detyrojë kthimin e opozitës dhe të qytetarëve nga kjo vendimmarrje. Zgjedhje moniste, zgjedhje të diktuara nga krimi, zgjedhje fasadë, të bëra vetëm për të legjitimuar një Parlament që nuk diktohet nga vota e popullit, por nga vota e krimit dhe e drogës, në Shqipëri nuk do të ketë”, tha Basha.
Ai më pas u përpoq që mos iu japë rëndësi qëndrimeve të ndërkombëtarëve karshi vendimeve të PD-së, duke zgjedhur këtë arsyetim:
“Interpretimet e qendrimeve të ndërkombëtarëve, gjithsecili i bën sipas vlerësimit të vet. Vlerësimi ynë është realist dhe bazohet në të gjitha kriteret, parimet, themelet, mbi të cilat ngrihen shoqëritë moderne perëndimore, të cilave duam t’i përkasim, si të Bashkimit Europian, apo Shteteve të Bashkuara të Amerikës”. /tesheshi.com/
