Kushtet për zgjedhjet parlamentare në Serbi nuk janë ideale, veçanërisht kur bëhet fjalë për median, por një bojkot nuk është zgjidhja, tha Zëvendës Ndihmës Sekretari i Shtetit dhe Përfaqësuesi Special për Ballkanin Perëndimor Matthew Palmer.
Tashmë, administrata Trump dhe vetë Palmer personalisht, po përballen me telashin nr.2 në rajon, atë të bojkotit, e kjo një vit pasi nr.1 i takonte opozitës shqiptare, tashmë tërësisht jashtë sistemit, pasi dogji dhe mandatet.
Në një intervistë për Zërin e Amerikës, ai tha se Shtetet e Bashkuara i kuptojnë disa prej argumenteve të opozitës se kushtet e zgjedhjeve nuk janë të drejta, por paralajmëron se zëri i saj do të dëgjohet më pak nëse largohet nga arena politike.
“Kur bëhet fjalë për zgjedhjet në 21 qershor, ne do të dëshironim që qytetarët e Serbisë të kishin zgjedhjet më të mira të mundshme, dhe inkurajojmë të gjitha partitë politike të marrin pjesë. Një bojkot nuk është pothuajse asnjëherë një mënyrë e mirë për të shprehur pakënaqësi. Ne e mirëpresim vendimin e atyre që vendosën të marrin pjesë dhe shpresojmë që qytetarët e Serbisë, kur të shkojnë në votime në 21 qershor, do të kenë alternativa të ndryshme për të votuar”, tha Palmer.
Madje, duke iu referuar rastit shqiptar, edhe pse pa e përmendur konkretisht, Palmer e vuri në dyshim daljen e opozitës nga parlamenti si një “taktikë të diskutueshme”, duke thënë se ishte më e vështirë të dëgjohej zëri i saj kur përjashtonte veten nga arena politike.
Nga ana tjetër, Palmer tha se nuk ishte e vërtetë që Shtetet e Bashkuara mbështesin stabilitetin në kurriz të demokracisë dhe se ky ishte një argument që ai kishte dëgjuar për 25 vjet në Ballkanin Perëndimor.
“Ne mbështesim vazhdimisht demokracinë, administrimin efikas, sundimin e ligjit, lirinë e mediave, ne mbështesim reformat, sundimin demokratik dhe transparent, jo vetëm në Serbi, por në të gjithë Ballkanin Perëndimor, vazhdimisht për 20 vjet,” tha ai.
Ai tha se Shtetet e Bashkuara punojnë me qeveritë që zgjidhen nga qytetarët, se ato qeveri nuk i zgjedhin ato, dhe se ai dëshiron që zgjedhjet të zhvillohen në kushte sa më demokratike dhe transparente. /tesheshi.com/
