Nga Blendi Gashi
Familja Jashari nga Prekazi, 17 vjet pas çlirimit, për herë të parë ka bojkotuar ceremoninë hapëse “Epopeja e UÇK-së” në kazermën “Adem Jashari”.
Në këtë ceremoni të organizuar nga qeveria për nder të 19 vjetorit të rënies së komandantit legjendar Adem Jashari dhe familjes së tij, asnjë pjesëtarë i familjes nuk ka marrë pjesë duke bërë të qarë hapur pakënaqësinë me udhëheqësit e shtetit.
Ibrahim Shala, zëdhënës nga Forca e Sigurisë së Kosovës ka konfirmuar se Familja Jashari ka pasur ftesë, mirëpo askush s’iu është përgjigjur.
“Familja Jashari nuk ka marrë pjesë në ceremoninë e sotme në Kazermën e FSK’së në Prishtinë. Ata kanë qenë të ftuar. Pjesëmarrja e tyre do të madhështonte edhe më shumë këtë organizim”, ka konfirmuar Shala, për mediat.
Padyshim se ky bojkot është një shuplakë e madhe për presidentin Thaçi, kryeministrin Mustafa e kryekuvendarin Veseli të cilët edhe pse folin fjalët më të mira për Jasharajt, nuk kanë lënë vend që të priten në kullë.
Ata bën një gjë të tillë edhe në ceremoninë e sotme por nuk morën rrugë drejt Odës së Jasharajve, duke treguar se fjalimet e tyre bëhen më shumë për konsum të opinionit.
Se pakënaqësia e Familjes Jashari ka arritur kulmin tregon edhe fakti se për herë të parë sivjet konaku i kësaj familje nga Prekazi ka qenë i mbyllur pasi në mungesë të kryefamiljarit Rifat Jashari që gjendet jashtë vendit, asnjë familjarë tjetër nuk e ka hapur derë e kullës.
Krisjet më të mëdha të Familjes Jashsari janë me Hashim Thaçin. Ky i fundit ka disa vite që nuk shkel në pragun e Jasharajve dhe arsyet vazhdojnë të mbeten enigmë pasi asnjëra palë nuk ka folur për mospajtimet që kanë mes vete.
Krisjet mes tyre u dëshmuan edhe një vit më parë kur ky i fundit u zgjedh president.
Me gjithë se i kishin vendet e rezervuara, në seancën solemne ku Thaçi dha betimin si president, munguan përfaqësuesit e familjes heroike nga Prekazi.
Thaçi dhe Veseli nuk shkelën në Prekaz as më 17 Shkurt me rastin e 9-vjetorit të Pavarësisë.
Kujtojmë se para dy viteve, më 5 mars, Bekim Jashari djali i Hamzë Jasharit kishte quajtur turp të institucioneve pse nuk kishin lejuar të intonohej himni kombëtar në ceremoninë përkujtimore për Familjen Jashari. /tesheshi.com/
