Në mënyrë nominale, Ilir Meta dhe bashkëshortja e tij Monika Kryemadhi kishin marrë ftesë për të qenë prezentë në festën e 25 vjetorit të Forumit të Rinisë Eurosocialiste, ku kreu i LSI-së dhe bashkëshortja e tij kanë qenë themelues dhe udhëheqës.
Meta ka qenë kryetar i FRESSH për një kohë të gjatë, ndërsa zonja Kryemadhi, drejtuese e degës së Tiranës.
Mirëpo të dy e kanë bojkotuar kremtimin e jubileut të FRESSH, çka për drejtuesit e PS-së që merrnin pjesë në takim, ishte këmbana më e madhe e alarmit për vijimin e koalicionit PS-LSI.
Kjo pasi, Meta edhe pse ka pasur probleme me Edi Ramën dhe përplasje në 4 vitet e aleancës së vështirë, ai nuk ka munguar kurrë në përvjetorin e eurosocialistëve, pasi kjo përbënte dhe nisjen e karrierës së tij të gjatë në politikë.
FRESSH-i, gjatë kohës deri në vitin 2000 ka qenë dhe një organizatë thuajse paralele me PS ku dolën dy kryeministra dhe ministra të shumtë, dhe një farë mënyrë nuk ishte pjesë e lidershipit të selisë rozë në mënyrë vertikale.
Një nga themeluesit e parë të FRESSH që kishte ardhur nga jashtë shtetit për të marrë pjesë në jubile, i tha tesheshi.com se krerët socialistë, që nga Edi Rama, Pandeli Majko, por edhe të tjerë, e kanë marrë sinjalin e bojkotit të Metës, si një sinjal fatal drejt largimit përfundimtar.
Madje një lider socialist është shprehur dje në takim të mbyllur me kolegët e tij, që tani duhen bërë llogaritë nëse LSI do të dalë në koalicion parazgjedhor me PD-në apo në koalicion paszgjedhor.
Ndërkaq, Edi Rama, i cili e ka parandjerë një bojkot, por që gjithsesi ka pasur shpresë për ardhjen e Metës në përvjetor, ka përgatitur dy lloje fjalimesh: njërin për aleancën e së majtës ddhe tjetrin duke hequr fjalën “Aleanca për Shqipërinë Europiane” dhe vendosur në vend të saj Partia Socialiste.
Ndërkaq, ai ka mbledhur kryesinë e ngushtë të ssocialistëve dhe ka hartur një plan organizativ të partisë në të gjithë vendin, të njëjtë siç u veprua me Dibrën dhe me Kolonjën.
“Nëse Ilir Meta do të vijë apo do të largohet, kjo nuk ka rëndësi, pasi ne duhet të përgatitemi të shkojmë në zgjedhje vetëm me PDIU-në dhe nuk mund të presim. Nëse i mbushet mendja që të vazhdojë koalicionin kjo nuk e prish planin, ata të mbledhin vota, por strukturat tona s’kanë pse i falin kërkujt asgjë”, mësohet se është shprehur kreu i Partisë Socialiste, njëkohësisht kryeministër i vendit.
Çdo të thotë ky plan?! Që listat e PS-së do të hartohen në mënyrë të tillë që të marrin vota edhe aty ku LSI ka targetin e saj electoral.
Janë caktuar dy drejtues të rëndësishëm të PS-së, që kanë një backraund në LSI para disa vitesh dhe i dinë mirë kontigjentet e partisë së Ilir Metës.
Deputeti socialist Pjerin Ndreu, për shembull ka qenë për një kohë të gjatë drejtues i LSI- Tiranë dhe ai është ngarkuar për të studiuar një gjë të tillë.
Por siç mësohet në këtë grup bëjnë pjesë edhe deputetë të LSI-së që kanë vendosur që të jenë me PS-në në katërvjeçarin e ardhshëm.
Për emrat përfliten disa, por për arsye se bëhet fjalë për lëvizje tejet të rezervuar, ata po veprojnë nën rrogoz.
I gjithë ky aksion përbën një zhvillim të ri politik: PS ka nisur fushatën e saj elektorale vetëm dhe të tillë do ta zhvillojë në të gjithë vendin.
Erjon Veliaj, Gramoz Ruçi, Saimir Tahiri dhe Stefan Çipa janë caktuar si përgjegjës për harrtimin e këtij plani të plotë, i cili më pas do të diskutohet në kryesinë e PS-së, javën që vjen. /tesheshi.com/
