Politikanë të rëndësishëm të Partisë Demokratike, aktualisht deputetë dhe anëtarë të forumeve të larta të saj, pritet që ta konsiderojnë vendimin për mospjesëmarrjen në zgjedhje si jo legjitim me arsyetimin se nuk është konsultuar me forumet brenda partisë.
Bëhet fjalë për katërshen bazë të përbërë nga Jozefina Topalli, Eduard Selami, Majlinda Bregu dhe Astrit Patozi, të cilët kanë pasur disa takime të rëndësishme me diplomatët e Shteteve të Bashkuara të Amerikës dhe të Bashkimit Europian për të treguar se vendimi ekstrem për bojkotimin e zgjedhjeve nuk është marrë nga forumet por kryesisht nga kryetari Lulzim Basha dhe ish-kryetari Sali Berisha.
Madje mësohet se Jozefina Topalli ka mbi tre javë që me një shkresë të veçantë i ka kërkuar Lulzim Bashës mbledhjen e grupit parlamentar të PD-së, por nuk ka pasur asnjë përgjigje.
Që prej asaj dite, Topalli nuk ka qenë prezente në seancat parlamentare të së enjtes në çadër.
Ndërkaq, Majlinda Bregu gjithashtu ka kërkuar që të formalizohet një mbledhje e Këshillit Kombëtar, por që gjithashtu nuk është bërë prezente.
Pritet që nëse përfundimisht Lulzim Basha do të vendosë bojkotin nga 18 qershori, atëherë të gjithë ish-drejtuesit e Partisë Demoratike të dalin publikisht kundër dhe të shpallin mënyra alternative të aksionit politik.
Disa prej figurave të PD-së po zgjedhin që të kandidojnë me partitë e tjera, ku veçohet Fatos Hoxha, ish-deputet i PD-së në Kukës për dy mandate ka zgjedhur PDIU-në e Shpëtim Idrizit, e cila ka nisur që tani një diskurs të egër kundër PS-së, siç duket për të tërhequr vota djathtas.
Siç është vënë re gjatë dy muajve e kusur protestë e PD-së nën çadër, fillimisht ajo kishte përkrahje edhe nga zërat kritikë ndaj Bashës; por më pas prezenca e tyre nisi të ishte e pakët deri në mungesë totale. Po ashtu dhe qëndrimet publike pro-çadrës që pothuajse kanë munguar tërësisht.
Të vetmen kartë të deritanishme në favor, PD ka pikërisht mosshfaqjen e ndonjë grupimi kundër brenda saj në terma publikë; por nëse shfaqet kjo, siç dhe pritet të ndodhë me katërshen e mësipërme, atëherë kjo do ishte një goditje e rëndë për integritetin politik dhe fuqinë e protestës. /tesheshi.com/
