Nga Mensur Krasniqi
Sasha Bogdanoviq, kryetar i LSDM-së në Qendër, reagoi ndaj publikimit të kryeministrit Nikolla Gruevski i cili duke iu përgjigjur ambasadorëve në twitter shkroi se populli i Republikës vet do të vendos për të ardhmen e tij.
“Po vijnë ditët më të vështira për Maqedoninë. Njeriu i cili është më i thirrur për ta nxjerr shtetin nga kriza, përsëri po e le popullin vetë, dukeu tallur me të. Populli le të vuaj, populli le të përlahet vetëm që ai të mbijetoj.
Cili popull do të vendos?
Të vdekurit që i ke vendosur në listat zgjedhore? Pusteci dhe Golo Brdo?
Të kërcënuarit me inspekcione? Të kërcënuarit me ndihmë sociale?”, pyeti ndërmjet tjerash Bogdanoviq.
Shtetet e Bashkuara të Amerikës, Britania e Madhe, Gjermania, Franca, Italia dhe Bashkimi Evropian, përmes ambasadorëve të tyre në Shkup shprehën zhgënjimin e tyre për bllokimin e bisedimeve dhe mos-realizimin e Marrëveshjes së Përzhinos. Edhe pse nuk kishte asnjë takim me zyrtarët qeveritarë, ambasadorët iu drejtuan mediave prej para ndërtesës së qeverisë, duke kërkuar përkushtim të veçantë nga pushteti për zbatimin e Marrëveshjes.
“I kemi bërë thirrje kryeministrit Nikolla Gruevski që të autorizojë ekipin e tij për të gjetur marrëveshje për çështjet e pazgjidhura të marrëveshjes së Përzhinos, si dhe të zbatojë reformat e nevojshme të cilat do të krijojnë terrenin për zgjedhje të besueshme, të lira dhe demokratike që do të pranohen brenda dhe jashtë vendit, si dhe për llogaridhënie në rast të shkeljeve. Sa i përket kësaj, presim që Prokurorit Special të votuar unanimisht nga Parlamenti, ti sigurohen mjetet që i ka kërkuar, për të zhvilluar punën e sajë të rëndësishme”, deklaroi në emër të të gjithëve Çarls Garet, ambasador i Britanisë së Madhe.
Kryeministri, Nikolla Gruevski ka zgjedhur twitter-in për t’ju përgjigjur ambasadorëve, që përmes një postimi ka theksuar se: “Për të ardhmen e Maqedonisë vendos vetë populli, e askush tjetër”. /tesheshi.com/
